शिरपूर, प्रतिनिधी : तालुक्यातील होळनाथे येथील एका व्यावसायिकाची अनोळखी मोबाईल कॉलद्वारे तब्बल ९९ हजार रुपयांची ऑनलाईन फसवणूक झाल्याची घटना समोर आली आहे. याप्रकरणी थाळनेर पोलिस ठाण्यात अज्ञात सायबर भामट्याविरोधात गुन्हा दाखल करण्यात आला असून पोलिस पुढील तपास करीत आहेत.
होळनाथे येथील आधार सेवा केंद्र चालक नरेंद्र फत्तेसिंग जाधव यांच्या मोबाईलवर अज्ञात क्रमांकावरून कॉल आला होता. त्यांनी कॉल स्वीकारल्यानंतर काही क्षणांतच त्यांच्या बँक खात्यातून ९९ हजार रुपये परस्पर वळते झाल्याचा संदेश मोबाईलवर प्राप्त झाला. कोणतीही वैयक्तिक माहिती अथवा ओटीपी न देता खात्यातील रक्कम गायब झाल्याने जाधव यांनी तातडीने थाळनेर पोलिस ठाण्यात धाव घेऊन तक्रार दाखल केली.
या घटनेमुळे परिसरात खळबळ उडाली असून नागरिकांनी अनोळखी कॉल, संशयास्पद लिंक किंवा अॅप्सबाबत सतर्क राहण्याचे आवाहन पोलिस व सायबर तज्ज्ञांकडून करण्यात येत आहे.
