सावेर(प्रतिनिधी) शिरपूर-चोपडा मार्गावरील सावेर गावाजवळ शुक्रवारी (१२ जून) सकाळी सुमारे ७ वाजेच्या सुमारास भरधाव ट्रक अनियंत्रित होऊन उलटल्यानंतर त्याला भीषण आग लागली. काही क्षणांतच आगीने रौद्र रूप धारण केल्याने परिसरात खळबळ उडाली.
शिरपूरकडे येत असलेला ट्रक सावेर येथील रंधे यांच्या पेट्रोल पंपाजवळ उलटला. अपघातानंतर ट्रकला अचानक आग लागल्याने संपूर्ण वाहन आगीच्या भक्ष्यस्थानी सापडले. आगीची तीव्रता लक्षात घेता चालक व सहचालक यांच्या अवस्थेबाबत सुरुवातीला कोणतीही माहिती मिळू शकली नव्हती.
घटनेमुळे शिरपूर-चोपडा मार्गावरील दोन्ही बाजूंची वाहतूक काही काळ ठप्प झाली. माहिती मिळताच अग्निशमन दल व पोलिसांनी घटनास्थळी धाव घेत आग आटोक्यात आणण्यासह वाहतूक सुरळीत करण्याचे काम हाती घेतले. अपघाताचे नेमके कारण आणि पुढील तपास सुरू आहे.
