धुळे : जिल्ह्यातील ग्रामीण व शहरी भागातील गुणवंत क्रिकेटपटूंना संधी उपलब्ध करून देण्यासाठी धुळे जिल्हा क्रिकेट असोसिएशनतर्फे सुरू करण्यात आलेल्या तालुकास्तरीय टॅलेंट सर्च मोहिमेला खेळाडू व पालकांकडून उत्स्फूर्त प्रतिसाद मिळत आहे. शिरपूर येथील यशस्वी आयोजनानंतर बुधवारी (ता. 10) धुळे शहरातील एस.व्ही.के.एम. संस्थेच्या मैदानावर मोहिमेचा दुसरा टप्पा उत्साहात पार पडला.
जिल्हाभरातील उदयोन्मुख क्रिकेटपटूंना योग्य व्यासपीठ मिळावे आणि त्यांच्यातील नैसर्गिक कौशल्याला वाव मिळावा, या उद्देशाने ही निवड मोहीम राबविण्यात येत आहे. धुळे तालुक्यातून सुमारे 350 खेळाडूंनी नोंदणी करून सहभाग नोंदविला.
यावेळी धुळे जिल्हा क्रिकेट असोसिएशनचे सल्लागार प्रकाश पाटील, उपाध्यक्ष विक्रम राठोड, सहसचिव प्रा. सतीश मराठे, दबीर शेख, सदस्य अरविंद किल्लेदार, नरेंद्र काळमेख तसेच निवड समितीचे सदस्य लहू पाटील (ज्युनिअर), राजेंद्र बारे आणि महिला निवड समितीच्या अध्यक्षा भावना चौरसिया उपस्थित होत्या.
पहिल्या दिवशी 14 वर्षांखालील व 16 वर्षांखालील गटातील खेळाडूंच्या निवड चाचण्या घेण्यात आल्या. फलंदाजी, गोलंदाजी, क्षेत्ररक्षण, शारीरिक तंदुरुस्ती तसेच खेळावरील आकलन व कौशल्य यांचे बारकाईने परीक्षण करण्यात आले. अनुभवी निवडकर्त्यांनी प्रत्येक खेळाडूची स्वतंत्र पाहणी करून त्यांची गुणवत्ता तपासली.
मोहिमेच्या पुढील टप्प्यात गुरुवारी (ता. 11) 19 वर्षांखालील, 23 वर्षांखालील, खुला गट तसेच महिला खेळाडूंसाठी निवड चाचण्या होणार आहेत. निवड प्रक्रिया पूर्णपणे पारदर्शक व गुणवत्तेच्या आधारे राबविण्यात येत असल्याचे आयोजकांनी सांगितले.
दरम्यान, धुळेनंतर पुढील टप्प्यात 13 जून रोजी दोंडाईचा येथील हस्ती पब्लिक स्कूलमध्ये टॅलेंट सर्च मोहिमेचे आयोजन करण्यात आले आहे.
धुळे जिल्हा क्रिकेट असोसिएशनचे अध्यक्ष तथा माजी नगराध्यक्ष भूपेशभाई पटेल आणि सल्लागार तथा माजी आमदार राजवर्धन कदमबांडे यांनी धुळे तालुक्यातून मिळालेल्या भरघोस प्रतिसादाबद्दल समाधान व्यक्त करत, जिल्ह्यातील अधिकाधिक खेळाडूंना संधी उपलब्ध करून देण्याचा निर्धार व्यक्त केला.
