धुळे : आधारभूत धान्य खरेदी योजनेअंतर्गत शेतकऱ्याच्या ज्वारीची मोजणी करून मालाचा दर्जा चांगला दाखविण्यासाठी पाच हजार रुपयांची लाच मागणाऱ्या पुरवठा निरीक्षक तथा गोदाम व्यवस्थापकाला धुळे लाचलुचपत प्रतिबंधक विभागाने रंगेहात पकडले. ही कारवाई मंगळवारी (ता. ३) धुळे येथील शासकीय गोदामात करण्यात आली.मनिष महेश बागुल (वय ३०, रा. साईछत्र अपार्टमेंट, आरटीओ कार्यालयाजवळ, पेठ रोड, नाशिक) असे अटक करण्यात आलेल्या संशयिताचे नाव आहे. तो धुळे तहसील कार्यालयात पुरवठा निरीक्षक तथा गोदाम व्यवस्थापक म्हणून कार्यरत आहे.
लाचलुचपत प्रतिबंधक विभागाने दिलेल्या माहितीनुसार, तक्रारदार शेतकरी व त्यांच्या पत्नी यांनी शासनाच्या आधारभूत धान्य खरेदी योजनेअंतर्गत ज्वारी विक्रीसाठी ऑनलाइन नोंदणी केली होती. ज्वारीची मोजणी करण्यासाठी ते ३ जून रोजी धुळे येथील शासकीय गोदामात आले असता, संबंधित मालाचा दर्जा चांगला दाखवून मोजणी करण्यासाठी मनिष बागुल यांनी पाच हजार रुपयांची लाचेची मागणी केली. तसेच लाच न दिल्यास ऑनलाइन बिल दाखविणार नसल्याची धमकीही दिल्याचे तक्रारीत नमूद करण्यात आले होते.
याबाबत शेतकऱ्याने धुळे लाचलुचपत प्रतिबंधक विभागाकडे तक्रार दाखल केली. तक्रारीची पडताळणी केल्यानंतर लाचेची मागणी झाल्याचे निष्पन्न झाले. त्यानंतर एसीबीच्या पथकाने सापळा रचून मनिष बागुल याला पाच हजार रुपयांची लाच स्वीकारताना रंगेहात पकडले.
ही कारवाई पोलीस उपअधीक्षक सचिन साळुंखे यांच्या मार्गदर्शनाखाली पोलीस निरीक्षक यशवंत बोरसे, पद्मावती कलाल, राजन कदम, मुकेश अहिरे, प्रवीण मोरे, संतोष पावरा, मकरंद पाटील, प्रवीण पाटील, प्रशांत बागुल, सागर शिर्के, प्रितेश चौधरी, चंद्रकांत सैदाणे, सागर माळी व सुधीर मोरे यांच्या पथकाने केली. प्रकरणी पुढील कारवाई सुरू आहे.
