शिरपूर : तालुक्यातील 16 ग्रामपंचायतींसाठी पोटनिवडणुकीचा कार्यक्रम जाहीर करण्यात आला असून माघारीनंतर 8 ग्रामपंचायत सदस्य बिनविरोध निवडून आले आहेत. तसेच 3 ग्रामपंचायतींमध्ये एकही नामनिर्देशन पत्र दाखल न झाल्याने त्या ठिकाणची सदस्यपदे रिक्त राहिली आहेत.
उर्वरित 5 ग्रामपंचायतींसाठी 4 सरपंच पदे व 1 सदस्य पदासाठी 14 वॉर्डांमध्ये सोमवार, 28 एप्रिल रोजी मतदान प्रक्रिया राबविण्यात येत आहे. निवडणूक प्रक्रिया शांततेत व सुरळीत पार पडावी यासाठी निवडणूक प्रशासनासह पोलीस प्रशासनही सज्ज झाले आहे.
प्रत्येक मतदान केंद्रावर 1 मतदान अधिकारी, 3 सहाय्यक अधिकारी आणि 1 शिपाई अशा एकूण 5 कर्मचाऱ्यांची नियुक्ती करण्यात आली आहे. मतदान यंत्रे व आवश्यक साहित्यांसह हे कर्मचारी पोलीस बंदोबस्तात संबंधित मतदान केंद्रांवर रवाना झाले.
सरपंच पदासाठी तऱ्हाड कसबे, खर्दे बु., पनाखेड आणि चांदसे-चांदसुर्या या ग्रामपंचायतींमध्ये मतदान होत आहे. तर भोईटी ग्रामपंचायतीतील एका सदस्य पदासाठी मतदान प्रक्रिया पार पडणार आहे.
या संपूर्ण निवडणूक प्रक्रियेवर तहसीलदार महेंद्र माळी, नायब तहसीलदार पंकज मगर, अव्वल कारकून सागर सोनवणे यांच्यासह शहर पोलीस ठाण्याचे पोलीस निरीक्षक किशोरकुमार परदेशी आणि तालुका पोलीस ठाण्याचे पोलीस निरीक्षक जयपाल हिरे हे लक्ष ठेवून आहेत.
निवडणूक प्रक्रिया शांततापूर्ण वातावरणात पार पडावी यासाठी प्रशासनाने सर्व आवश्यक तयारी पूर्ण केली असून मतदारांमध्येही उत्सुकतेचे वातावरण निर्माण झाले आहे.
