शिरपूर (प्रतिनिधी) तालुक्यातील होळनांथे येथील एका १६ वर्षीय विद्यार्थ्याचा कुलरला स्पर्श झाल्याने विजेचा धक्का बसून मृत्यू झाल्याची अत्यंत दुर्दैवी घटना मंगळवारी दुपारी घडली. या घटनेमुळे परिसरात शोककळा पसरली आहे.
मिळालेल्या माहितीनुसार, होळनांथे येथील गोविंदा वामन मराठे यांचा नातू हर्षल विनोद मराठे (वय १६) हा नुकताच दहावीची परीक्षा देऊन घरी अभ्यास करत होता. दरम्यान, दुपारी सुमारे १ वाजण्याच्या सुमारास त्याचा हात घरातील कुलरला लागला असता त्याला विजेचा जोरदार धक्का बसला. त्या वेळी घरात अन्य कोणीही नसल्याने त्याला तातडीची मदत मिळू शकली नाही. यातच त्याचा मृत्यू झाला.हर्षल हा अभ्यासू व होतकरू विद्यार्थी म्हणून ओळखला जात होता. त्याच्या अकाली निधनाने होळनांथे व अजंदे बुद्रुक परिसरात हळहळ व्यक्त केली जात आहे.
त्याच्या पश्चात आई-वडील व आजोबा असा परिवार आहे.दरम्यान, नागरिकांनी घरातील विद्युत उपकरणे वापरताना आवश्यक ती काळजी घ्यावी, असे आवाहन करण्यात येत आहे.
