शिरपुरात चोरट्यांचा घरासमोरून स्कॉर्पिओ केली लंपास, पोलिसांना खुलं आव्हान ?

शिरपुर : शहरातील वरझडी रोड परिसरात अज्ञात चोरट्यांनी अक्षरशः पोलिसांना खुलं आव्हान देत घरासमोर उभी असलेली महिंद्रा स्कॉर्पिओ कार रात्रीच्या अंधारात लंपास केल्याची धक्कादायक घटना उघडकीस आली आहे. या घटनेमुळे शहरातील सुरक्षेवर पुन्हा एकदा प्रश्नचिन्ह निर्माण झाले आहे.
संजयकुमार कांतीलाल प्रजापती (वय ३८, रा. अंजार, गुजरात) हे ड्रायव्हर म्हणून काम करतात. १४ एप्रिल रोजी ते सुरतहून इंदूरकडे जाण्यासाठी निघाले असताना रात्री सुमारे ११ वाजता शिरपुरातील वरझडी रोडवरील एका घरासमोर त्यांनी महिंद्रा स्कॉर्पिओ (क्र. MH 12 VV 0764) पार्क केली. वाहन व्यवस्थित लॉक करून ते घरात झोपले.
मात्र, पहाटे ४.३० वाजता बाहेर येताच त्यांच्या पायाखालची जमीन सरकली. काही तासांपूर्वी उभी असलेली स्कॉर्पिओ गायब झाली होती. परिसरात शोधाशोध करूनही वाहनाचा मागमूस न लागल्याने अज्ञात चोरट्यांनीच ती चोरून नेल्याचे स्पष्ट झाले.
सुमारे ५ लाख रुपये किंमतीची पांढऱ्या रंगाची ही स्कॉर्पिओ चोरीला गेल्याने खळबळ उडाली आहे. याप्रकरणी शिरपुर शहर पोलीस ठाण्यात गुन्हा दाखल करण्यात आला आहे.
दरम्यान, भरवस्तीतून एवढ्या सहजतेने कार चोरीला जाणे ही गंभीर बाब मानली जात असून, पोलिसांच्या गस्त व सुरक्षाव्यवस्थेवर नागरिकांकडून संताप व्यक्त केला जात आहे. पुढील तपास पोहेकॉ रविंद्र आखडमल करीत आहेत.