जॉबच्या बहाण्याने लाखोंचा गंडा; दोघांविरोधात गुन्हा दाखल

शिरपूर : नोकरी मिळवून देण्याच्या नावाखाली फसवणुकीचे प्रकार दिवसेंदिवस वाढत असताना, शिरपूरमध्ये असाच एक धक्कादायक प्रकार समोर आला आहे. नोकरीच्या शोधात असलेल्या एका टोल मॅनेजरला मोठ्या पगाराची नोकरी मिळवून देण्याचे आमिष दाखवत दोन जणांनी तब्बल ७ लाख ८२ हजार रुपयांचा गंडा घातल्याची घटना उघडकीस आली आहे.
या प्रकरणी निमझरी रोड परिसरात राहणारे कल्पेश अशोक वाघ यांनी शिरपूर शहर पोलीस ठाण्यात फिर्याद दिली आहे. त्यांच्या तक्रारीनुसार, नाशिक जिल्ह्यातील सागर भाऊसाहेब बोरसे आणि त्याचा साथीदार श्रीकांत गीते यांनी विश्वास संपादन करून नोकरी लावून देण्याचे आश्वासन दिले. आकर्षक पगार, खात्रीशीर नियुक्ती आणि लवकर जॉइनिंग असे गाजर दाखवत त्यांनी वाघ यांच्याकडून वेळोवेळी पैसे उकळले.
१३ नोव्हेंबर ते १६ डिसेंबर २०२३ या कालावधीत संशयितांनी रोख रक्कम तसेच ऑनलाईन व्यवहारांच्या माध्यमातून एकूण ७.८२ लाख रुपये घेतले. सुरुवातीला नोकरी संदर्भात सकारात्मक प्रतिसाद देत विश्वास निर्माण करण्यात आला; मात्र कालांतराने संशयितांनी टाळाटाळ सुरू केली. नोकरीबाबत कोणतीही ठोस प्रगती न झाल्याने आणि संपर्कही टाळला जात असल्याचे लक्षात आल्यानंतर वाघ यांनी पोलिसांकडे धाव घेतली.
फिर्यादीच्या तक्रारीवरून शिरपूर शहर पोलिसांनी दोघांविरोधात फसवणुकीचा गुन्हा नोंदवला असून, या प्रकरणाचा अधिक तपास सुरू आहे. दरम्यान, अशा प्रकारच्या नोकरीच्या आमिषांना बळी न पडता नागरिकांनी सतर्क राहावे, असे आवाहन पोलिसांकडून करण्यात येत आहे.