तालुक्यात ग्रामपंचायत पोटनिवडणुकीची रणधुमाळी; २८ एप्रिलला मतदान

शिरपूर तालुक्यातील ग्रामपंचायतींमधील रिक्त जागांसाठी पोटनिवडणुकीचा बिगुल वाजला आहे. मंगळवार पासून नामनिर्देशन दाखल करण्यास सुरुवात झाली असून २८ एप्रिल २०२६ रोजी मतदान होणार आहे. या निवडणुकीत ४ सरपंच आणि १३ सदस्य पदांसाठी निवडणूक होणार असल्याची माहिती तहसीलदार महेंद्र माळी यांनी दिली आहे.
तालुक्यात मृत्यू, राजीनामा, अनर्हता आदी कारणांमुळे ३१ जानेवारीअखेर रिक्त झालेल्या खर्दे बु., चांदसे-चांदसुर्या, तऱ्हाड कसबे आणि पनाखेड येथील सरपंच पदांसाठी थेट निवडणूक होणार आहे. तसेच अजनाड, टेंभेपाडा, निमझरी, लौकी, वाघाडी, तोंदे, नांथे, भोईटी, मांजरोद, उमर्दा, बुडकी, खर्दे खु. पाथर्डे या ग्रामपंचायतींमधील सदस्य पदांसाठी निवडणूक जाहीर झाली असून त्यासाठी मतदान होणार आहे.
इच्छुक उमेदवारांना ७ ते १३ एप्रिलदरम्यान (११ व १२ एप्रिल सुट्टी वगळून) सकाळी ११ ते दुपारी ३ या वेळेत शिरपूर तहसील कार्यालयात नामनिर्देशन अर्ज दाखल करता येणार आहेत. केवळ विहित नमुन्यातील व स्वाक्षरी केलेले अर्जच ग्राह्य धरले जाणार आहेत.
१५ एप्रिल रोजी अर्जांची छाननी होईल, तर १७ एप्रिल दुपारी ३ वाजेपर्यंत उमेदवारी अर्ज मागे घेता येतील. त्यानंतर अंतिम उमेदवारांची यादी जाहीर करून त्यांना निवडणूक चिन्हांचे वाटप करण्यात येईल.
मतदानाची प्रक्रिया २८ एप्रिल रोजी सकाळी ७.३० ते सायंकाळी ५.३० या वेळेत पार पडणार असून २९ एप्रिल रोजी तहसील कार्यालयात मतमोजणी होणार आहे. प्रशासनाने निवडणूक प्रक्रिया पारदर्शक आणि शांततेत पार पाडण्याचे आवाहन केले आहे.