धुळे जिल्हा संघ घोषित; शिरपूरचा आनंद जगताप कर्णधार,तर धुळ्याचा रोनक पाटील उपकर्णधार

शिरपूर : महाराष्ट्र क्रिकेट असोसिएशन आयोजित खुल्या गटाची दोनदिवसीय आमंत्रित क्रिकेट स्पर्धा १६ फेब्रुवारी ते ३ मार्चदरम्यान पुण्यात रंगणार आहे. या स्पर्धेसाठी धुळे जिल्हा क्रिकेट संघ जाहीर करण्यात आला असून कर्णधारपदी शिरपूरच्या आनंद जगताप तर उपकर्णधारपदी धुळ्याच्या रोनक पाटील यांची निवड झाली आहे.
धुळे संघाचा समावेश अव्वल ‘अ’ गटात असून बीड जिल्हा, जेट्स इलेव्हन पुणे, रिकरेशन क्रिकेट क्लब पुणे, स्पोर्ट्समन क्रिकेट क्लब पुणे व झोराष्ट्रीयन क्रिकेट क्लब पुणे यांच्यासह सामना होणार आहे. या स्पर्धेतील कामगिरीच्या आधारे प्रतिष्ठेच्या रणजी करंडक स्पर्धेसाठी महाराष्ट्र संघात निवडीची संधी मिळणार असल्याने स्पर्धेला विशेष महत्त्व आहे.
संघाला प्रशिक्षक फिरोज शेख यांचे मार्गदर्शन लाभणार आहे. अलीकडेच झालेल्या महा टी-२० स्पर्धेत चार विजयांची नोंद केल्यानंतर धुळे संघाकडून प्रभावी कामगिरीची अपेक्षा व्यक्त होत आहे. जिल्हा क्रिकेट असोसिएशनचे अध्यक्ष भूपेशभाई पटेल व माजी आमदार राजवर्धन कदमबांडे यांनी संघाचे अभिनंदन करून शुभेच्छा दिल्या.