शिरपूर शहरातील दोन मालवाहतूक हायवा डंपर चोरीप्रकरणी शिरपूर शहर पोलिसांनी धडक कारवाई करत आंतरराज्यीय टोळीचा पर्दाफाश केला. या कारवाईत चार जणांना अटक करण्यात आली असून चोरीस गेलेले दोन्ही हायवा डंपर तसेच गुन्ह्यात वापरलेली कार जप्त करण्यात आली आहे.
करवंद नाका येथील एच.पी. पेट्रोल पंपासमोरून MH-18 BZ 5114 क्रमांकाचा हायवा तसेच शिरपूर-शहादा रोडवरील पटेल सर्विस सेंटरसमोरून MH-18 BH 1718 क्रमांकाचा दुसरा हायवा अज्ञात चोरट्यांनी लंपास केला होता. याप्रकरणी शहर पोलीस ठाण्यात गुन्हा दाखल करण्यात आला होता.
गुन्ह्याचा तपास करताना पोलिसांनी सीसीटीव्ही फुटेज आणि फास्टटॅगची माहिती तपासली. पोलीस निरीक्षक किशोरकुमार परदेशी यांच्या मार्गदर्शनाखाली पोहेकॉ रवींद्र आखडमल व डीबी पथकाने घटनास्थळ व परिसरातील कॅमेऱ्यांची बारकाईने पडताळणी केली. तसेच गुप्त बातमीदारांकडून मिळालेल्या माहितीच्या आधारे तपासाचा वेग वाढविण्यात आला.
या तपासात महावीरप्रसाद भवरलालजी शर्मा (रा. भिलवाडा, राजस्थान), इरफान उस्मान मेव (रा. नुह, हरियाणा), नियामत दिनू मेव (रा. पलवल, हरियाणा) व कालू गफुरखों मेव (रा. भिलवाडा, राजस्थान) यांनी संगनमताने चोरी केल्याचे निष्पन्न झाले. संशयितांनी HR-52G-7875 क्रमांकाच्या मारुती सुझुकी बलेनो कारचा वापर करून चोरी केल्याची कबुली दिली.
पोलिसांनी राजस्थान राज्यातील भिलवाडा येथे दोन पंचांसमक्ष कारवाई करत दोन्ही हायवा डंपर व संबंधित कार जप्त केली. त्यानंतर चारही संशयितांना मुद्देमालासह शिरपूर येथे आणून अटक करण्यात आली.संशयितांना न्यायालयात हजर केले असता न्यायालयाने पाच दिवसांची पोलीस कोठडी सुनावली आहे. पुढील तपास शिरपूर शहर पोलीस ठाण्याचे पोहेकॉ रवींद्र आखडमल करीत आहेत.
