शिरपूर शहर पोलीसांची धडाकेबाज कामगिरी,नवीन बांधकामातून इलेक्ट्रिक वायर चोरी करणारे 2 संशयीत जेरबंद

शिरपूर (प्रतिनिधी) शहरातील वरझडी रोड परिसरात सुरू असलेल्या नवीन घराच्या बांधकामातून इलेक्ट्रिक वायर चोरी करणाऱ्या दोन तरुणांना शिरपूर शहर पोलीस ठाण्याच्या डी.बी.पथकाने शिताफीने ताब्यात घेतले.संशयीतांकडून एकूण १ लाख ५ हजार ७५ रुपये किंमतीचा मुद्देमाल जप्त करण्यात आला आहे.
पोलिसांनी दिलेल्या माहितीनुसार,८ फेब्रुवारी रोजी सायंकाळी ७ ते ९ फेब्रुवारी रोजी सकाळी ८ या दरम्यान अज्ञात चोरट्याने वरझडी रोडवरील पाणी फिल्टर प्लांटच्या मागील ले-आऊट क्र. ३१, प्लॉट क्र. ३० येथे सुरू असलेल्या नवीन घराचे कुलूप तोडून आत प्रवेश केला. घरातील सुमारे ५५ हजार ७५ रुपये किंमतीचे आरआर केबल कंपनीचे १७ बॉक्स (हिरवा, पिवळा, काळा, लाल व निळा रंग) तसेच फिटिंग केलेली वायर चोरी करून नेल्याप्रकरणी शहर पोलीस ठाण्यात गुन्हा दाखल करण्यात आला होता .गुन्ह्याचा तपास सुरू असताना पोलीस निरीक्षक किशोरकुमार परदेशी यांच्या मार्गदर्शनाखाली डी.बी. पथकाने वेगाने तपासचक्रे फिरवत तालुक्यातील कळमसरे येथील अरुणावती नदी पुलाजवळ दोन इसम काळ्या रंगाच्या स्प्लेंडर मोटारसायकल (क्र. एमएच १८ सीसी ५२२०) वर गोणीत व खोक्यात संशयास्पद वस्तू घेऊन जाताना आढळले. त्यांना थांबवून चौकशी केली असता त्यांनी आपली नावे रोहित दगडू कोळी (वय १९, रा. अजंदे) व बबलू ऊर्फ आदित्य जामसिंग पावरा (वय १९, रा. पारशीपाडा, बरहाडी) अशी सांगितली.
त्यांच्या ताब्यातील गोणी व खोक्यात इलेक्ट्रिक वायर असल्याचे आढळले. अधिक चौकशीअंती त्यांनी सदर वायर पाणी फिल्टर प्लांटच्या मागील बांधकामातून संगनमताने चोरी केल्याची कबुली दिली. पोलिसांनी ५५,०७५ रुपये किंमतीची वायर व ५० हजार रुपये किंमतीची हिरो कंपनीची स्प्लेंडर मोटारसायकल असा एकूण १,०५,०७५ रुपयांचा मुद्देमाल जप्त केला.
दोन्ही आरोपींना अटक करण्यात आली असून त्यांना ११ फेब्रुवारी २०२६ पर्यंत पोलीस कोठडी सुनावण्यात आली आहे. पुढील तपास पोहेकॉ रविंद्र आखडमल करीत आहेत.
ही कारवाई पोलीस अधीक्षक श्रीकांत धिवरे, अपर पोलीस अधीक्षक अजय देवरे व उपविभागीय पोलीस अधिकारी सुनिल गोसावी यांच्या मार्गदर्शनाखाली पोलीस निरीक्षक किशोरकुमार परदेशी तसेच डी.बी. पथकातील रविंद्र आखडमल, विनोद आखडमल, गोविंद कोळी, मंटू साळुंके, प्रशांत पवार, मनोज महाजन, योगेश दाभाडे, मनोज दाभाडे, सचिन वाघ, आरीफ तडवी व सोमा ठाकरे यांनी केली.