सात लाखांची कार चोरट्यांनी लंपास; शिरपूरात खळबळ

शिरपूर : शहरातील जानकीरामनगर परिसरात घरासमोर उभी असलेली सुमारे सात लाख रुपये किमतीची कार चोरट्यांनी लंपास केल्याची घटना मंगळवारी मध्यरात्रीच्या सुमारास घडली. या घटनेमुळे परिसरात भीतीचे वातावरण निर्माण झाले असून शहरातील वाहनचोरीच्या घटनांत वाढ होत असल्याचे पुन्हा एकदा अधोरेखित झाले आहे.
जानकीरामनगर येथील प्लॉट क्रमांक २२ येथे वास्तव्यास असलेले नरेंद्र दत्तात्रय पाटील यांनी आपली कार (क्रमांक एमएच-१८ बीसी-८५५७) नेहमीप्रमाणे घरासमोर अंगणात उभी केली होती. मध्यरात्रीच्या सुमारास अज्ञात चोरट्यांनी संधी साधून ही कार चोरून नेली. सकाळी उठल्यानंतर अंगणात कार दिसून न आल्याने पाटील यांना चोरी झाल्याचे लक्षात आले.
त्यानंतर त्यांनी तात्काळ शिरपूर शहर पोलिस ठाण्यात धाव घेत तक्रार दाखल केली. त्यांच्या फिर्यादीवरून अज्ञात चोरट्यांविरुद्ध वाहनचोरीचा गुन्हा दाखल करण्यात आला आहे. चोरीस गेलेल्या कारची किंमत अंदाजे सात लाख रुपये असल्याचे पोलिसांनी सांगितले.या प्रकरणाचा तपास पोहेकॉ राजेंद्र रोकडे करीत असून परिसरातील सीसीटीव्ही फुटेज तपासण्यासह संशयितांचा शोध सुरू आहे. सलग घडणाऱ्या वाहनचोरीच्या घटनांमुळे नागरिकांनी वाहनांच्या सुरक्षेबाबत अधिक सतर्क राहण्याचे आवाहन पोलिसांनी केले आहे.