गधडदेव शिवारात बनावट देशी दारू कारखाना उध्दवस्त

शिरपूर (प्रतिनिधी) शिरपूर तालुक्यातील गधडदेव शिवारातील आंबाडूकपाडा येथे सुरू असलेल्या बनावट देशी दारू कारखान्यावर राज्य उत्पादन शुल्क विभागाने १ रोजी धडक कारवाई करत सुमारे ५ लाख १२ हजार रुपयांचा मुद्देमाल जप्त केला. कारखाना चालविणारा संशयित कारवाईची चाहूल लागताच फरार झाला असून त्याच्याविरुद्ध महाराष्ट्र दारूबंदी अधिनियमान्वये गुन्हा दाखल करण्यात आला आहे.
याबाबत मिळालेल्या माहितीनुसार, आंबाडूकपाडा परिसरात बनावट देशी दारू तयार केली जात असल्याची गुप्त माहिती राज्य उत्पादन शुल्क विभागाचे निरीक्षक बी. व्ही. हिप्परगेकर यांना मिळाली होती. माहितीच्या आधारे १ रोजी पथकाने संबंधित ठिकाणी छापा टाकला. मात्र पथक येत असल्याची चाहूल लागताच कारखान्यातील संशयित पसार झाला.
छाप्यात पथकाने झोपडीची झडती घेतली असता बनावट देशी दारूच्या ४,५०० सिलबंद बाटल्या (४५ खोके), देशी दारू ‘टँगो पंच’च्या ३,००० सिलबंद बाटल्या (३० खोके), ३५ लिटर क्षमतेचे ७ प्लास्टिक कॅन, २४५ लिटर तयार बनावटीची देशी दारू तसेच १२ हजार रिकाम्या बाटल्या असा एकूण ५ लाख १२ हजार रुपये किमतीचा मुद्देमाल हस्तगत करण्यात आला.
ही कारवाई राज्य उत्पादन शुल्क विभागाच्या वरिष्ठ अधिकाऱ्यांच्या मार्गदर्शनाखाली निरीक्षक बी. व्ही. हिप्परगेकर, हाडाखेड तपासणी नाक्याचे निरीक्षक देविदास नेहूल, एस. पी. मते यांच्यासह जवान हेमंत पाटील, काशिनाथ गोसावी, प्रतीकेश भामरे, एम. पी. म्हस्के, दीपक अहिरराव, बाळकृष्ण सोनवणे, कल्पेश शेलार, मनोज धुळेकर, सुरेश शिरसाळे, रवींद्र देसले, निलेश मोरे, भाग्यश्री पाटील यांच्या पथकाने केली.