महाराष्ट्रभर एटीएम फोडून बँकिंग व्यवस्थेला आव्हान देणाऱ्या सराईत टोळीचा अखेर शिरपूर शहर पोलिसांनी पर्दाफाश केला आहे. पहाटेच्या अंधारात सुरू असलेला थरार, तब्बल काही किलोमीटरचा पाठलाग आणि शेवटी आरोपींच्या मुसक्या आवळण्यात पोलिसांना यश आले.
17 जानेवारी 2026 रोजी पहाटे 2.15 वाजण्याच्या सुमारास, शिरपूर उपजिल्हा रुग्णालयासमोरील बँक ऑफ बडोदा एटीएम मशीनला लोखंडी साखळी बांधून पिकअप वाहनाच्या सहाय्याने ओढून फोडण्याचा प्रयत्न सुरू असल्याची माहिती गस्तीवरील पोलिसांना मिळाली. माहिती मिळताच पोलिसांनी तातडीने घटनास्थळी धाव घेतली.मात्र अंधाराचा फायदा घेत आरोपी घटनास्थळा वरून पसार झाले.थोड्याच वेळात पित्रेश्वर स्टॉप परिसरात संशयास्पद पिकअप वाहन आढळले.पोलिसांना पाहताच आरोपींनी वाहन वेगात शहादा फाट्याकडे पलायन केले. यानंतर सुरू झाला अक्षरशः चित्रपटाला लाजवणारा पाठलाग.मुंबई- आग्रा महामार्गावर नाकाबंदी, बॅरिकेट्स तोडत, दहिवद गावात घुसून पुन्हा महामार्गावर येत आरोपींनी पोलिसांना चकवण्याचा प्रयत्न केला. विशेष म्हणजे पिकअपला बांधलेली 20 फूट लोखंडी साखळी रस्त्यावर घासत ठिणग्या उडवत होती, तरीही पोलिसांनी पाठलाग सोडला नाही.
