थाळनेर पोलीस ठाण्यातील लाचखोर पोलिसांना २ दिवसांची पोलीस कोठडी

शिरपूर : शिरपूर तालुक्यातील थाळनेर पोलीस ठाण्यातील चार पोलीस अंमलदारांवर धुळे लाचलुचपत प्रतिबंधक विभागाच्या पथकाने कारवाई केल्यानंतर मंगळवार दि. १३ जानेवारी रोजी त्यांना शिरपूर न्यायालयात हजर करण्यात आले. यावेळी न्यायालयाने चौघांनाही २ दिवसांची पोलीस कोठडी सुनावली आहे.
अंमली पदार्थ विरोधी कायद्यान्वये दाखल असलेल्या गुन्ह्यात आरोपीस अटक टाळून सहकार्य करण्याच्या बदल्यात लाच मागितल्याप्रकरणी थाळनेर पोलीस ठाण्यातील पोलीस अंमलदार मुकेश पावरा यास धुळे लाचलुचपत प्रतिबंधक विभागाच्या पथकाने सोमवारी दि. १२ जानेवारी रोजी दोन लाख रुपयांची लाच स्वीकारताना रंगेहाथ ताब्यात घेतले होते.
या प्रकरणाच्या चौकशीनंतर थाळनेर पोलीस ठाण्याचे पोलीस हवालदार भूषण रामोळे तसेच किरण सोनवणे, मुकेश पावरा आणि धनराज मालचे यांच्याविरोधात रात्री उशिरा शहर पोलीस ठाण्यात गुन्हा दाखल करण्यात आला. दरम्यान, लाचलुचपत प्रतिबंधक विभागाच्या कारवाईनंतर उर्वरित तिघे पोलीस कर्मचारी फरार झाले होते. मात्र, न्यायालयात स्वतःहून हजर झाल्यानंतर चौघांनाही न्यायालयाने दोन दिवसांची पोलीस कोठडी सुनावली.दरम्यान, जिल्हा पोलीस अधीक्षक श्रीकांत धिवरे यांनी लाच प्रकरणात गुन्हा दाखल झाल्यानंतर संबंधित चारही पोलीस अंमलदारांना निलंबित केले आहे. तसेच, ढिसाळ पर्यवेक्षण व कर्मचाऱ्यांवर योग्य नियंत्रण न ठेवल्याचा ठपका ठेवत थाळनेर पोलीस ठाण्याचे प्रभारी सहाय्यक पोलीस निरीक्षक शत्रुघ्न पाटील यांनाही निलंबित करण्यात आले आहे.या कारवाईमुळे तालुक्यासह संपूर्ण जिल्हा पोलीस दलात एकच खळबळ उडाली आहे.