शहरात पतंगाच्या मांजाने ७ वर्षीय बालक गंभीर जखमी; धुळ्याला रेफर

शिरपूर : पतंगाच्या मांज्यामुळे घडलेल्या गंभीर घटनेत ७ वर्षीय बालक जखमी झाल्याची घटना आज रविवार दि. ११ जानेवारी २०२६ रोजी दुपारी ४.१५ वाजेच्या सुमारास घडली आहे. राज आनंदसिंग पिंपळे (वय ०७, रा. वारुळ, ता. शिंदखेडा, जि. धुळे) हा बालक आपल्या काका धनराज साहेबराव पिंपळे यांच्यासोबत मोटारसायकलने शिरपूरहून करवंदकडे जात असताना कृष्णा व्हॅली परिसरात त्याच्या गळ्याला पतंगाचा मांजा लागून तो गंभीर जखमी झाला.
घटनेनंतर काका धनराज पिंपळे यांनी तात्काळ जखमी बालकास शिरपूर येथील उपजिल्हा रुग्णालयात दाखल केले. येथे डॉक्टरांनी प्राथमिक उपचार केले असता गळ्याला गंभीर दुखापत झाल्याचे निदर्शनास आल्याने अधिक उपचारासाठी त्यास धुळे येथील जिल्हा रुग्णालयात रेफर करण्यात आले आहे.
या घटनेची माहिती उपजिल्हा रुग्णालयातील वार्डबॉय नितेश गवळी यांनी वैद्यकीय अधिकारी डॉ. राहुल लांबोळे यांच्या आदेशाने शिरपूर शहर पोलीस ठाण्यात दिली आहे. या प्रकारामुळे पतंग उडवताना नायलॉन व काचलेपित मांज्याच्या वापरामुळे होणाऱ्या धोक्याबाबत पुन्हा एकदा गंभीर प्रश्न उपस्थित झाला असून नागरिकांनी विशेषतः लहान मुलांच्या सुरक्षिततेबाबत दक्षता घेण्याची गरज व्यक्त होत आहे.