क्राइम ब्लास्ट ब्यूरो
शहर पोलिस ठाण्याच्या पथकाने तालुक्यातील वाडी गावातील दोन संशयितांना अटक करुन त्यांच्याकडून चोरीच्या नऊ मोटारसायकल जप्त केल्या. या मोटारसायकलची एकूण किंमत तीन लाख 60 हजार रुपये आहे.
शहरातील 80 फुटी रस्त्यावरुन 8 मेस रात्री राधेश्याम पाटील याची मोटारसायकल (एमएच 19,इ इडी 8410) चोरीस गेली होती. या गुन्ह्याचा तपास करतांना सहा जूनला पेट्रोलिंग पथकाला बजाज पल्सर दुचाकीवर दोन तरूण फिरतांना आढळले. त्याची चौकशी केल्यावर संशयितांनी दिशाभूल करणारी उत्तरे दिली. त्यामुळे पोलिसांनी त्यांना ताब्यात घेतले. चौकशीअंती संशयितांची नावे दिनेश आपसिंह पावरा (वय 22) व विशाल सचिन भिल (वय22, दोघे रा.वाडी) असल्याचे निष्पन्न झाले. त्यांनी चोरीची कबुली देऊन वाडी गावाजवळ कोरड्या नाल्यात लपवून ठेवलेल्या मुद्देमालाची माहिती दिली. तेथून एकूण नऊ दुचाकी पोलिसांनी जप्त केल्या. त्यांची किंमत तीन लाख 60 हजार रुपये आहे. संशयितांना न्यायालयाने एका दिवसाची पोलिस कोठडी दिली. हवालदार रवींद्र आखडमल तपास करीत आहेत.
पोलिस अधीक्षक श्रीकांत धिवरे, अपर अधीक्षक किशोर काळे, डीवायएसपी सुनिल गोसावी यांच्या मार्गदर्शनाखाली निरीक्षक किशोरकुमार परदेशी, शोध पथकाचे हवालदार राजेंद्र रोकडे, रवींद्र आखडमल, सोमा ठाकरे, आरिफ तडवी, विलास कोळी, सचिन वाघ, विनोद आखडमल, गोविंद कोळी, योगेश दाभाडे, भटू साळुंखे, प्रशांत पवार, मनोज महाजन, मनोज दाभाडे, दादाभाई बोरसे, रवींद्र महाले यांनी ही कामगिरी बजावली.
