क्राईम ब्लास्ट ब्यूरो
मुंबई आग्रा राष्ट्रीय महामार्गावर जय भद्रा भूई काट्यावर एका संशयिताकडून एक लाख 33 हजार 650 रुपये किमतीचे बनावट कापसाचे बियाणे जप्त करण्यात आले.
20 मे रोजी दुपारी दोन वाजता ही कारवाई करण्यात आली. सांगवी पोलीस व जिल्हा गुणवत्ता नियंत्रण निरीक्षक अरुण श्रीराम तायडे यांनी कारवाई केली.
तायडे यांना संशयित बोगस बियाणे विक्री करीत असल्याची माहिती मिळाली होती. त्यांनी त्याच्याशी संपर्क करून खरेदीदार असल्याचे भासवून बियाणे विक्रीसाठी बोलावून घेतले. महामार्गावर जय भद्रा भुईकाटा येथे संशयित बियाण्यांच्या साठ्यासह पोहचला. त्याचवेळी पोलिसांनी छापा टाकून संशयित सूर्यकांत बन्सीलाल गुजर उर्फ पंकज पटेल (रा.भरवाडे) याला ताब्यात घेतले. त्याच्याकडे एक लाख 33 हजार 650 रुपये किमतीची कपाशीच्या बियाण्याची 81 पाकिटे आढळली. त्यावर उत्पादन क्रमांक, प्रमाणीकरण व अन्य काहीही मजकूर नव्हता. त्यामुळे सदर बियाणे बनावट असून शेतकऱ्यांची फसवणूक करण्याच्या उद्देशाने संशयित बाळगून असल्याचे निष्पन्न झाले. अरुण तायडे यांनी दिलेल्या फिर्यादीवरून संशयित पंकज पटेल, भरतकुमार दुलाभाई पटेल (रा.अहमदाबाद, गुजरात), बियाण्यांचे उत्पादक कंपनी व सदर कंपनीचे प्रतिनिधी अशा एकूण सहा जणांविरोधात सांगवी पोलीस ठाण्यात गुन्हा दाखल करण्यात आला. पेरणीपूर्व हंगामातच बनावट बियाणे विक्रीचा प्रयत्न उघडकीस आल्याने परिसरात खळबळ माजली आहे.
