क्राईम ब्लास्ट ब्यूरो
गुन्ह्याचा तपास लवकर करून कोर्टात चार्जशीट दाखल करण्यासाठी पोलिसांना 10 हजार रुपये द्यावे लागतील अशी मागणी करून लाच स्वीकारताना साक्री तालुक्यातील बळसाने येथील पोलीस पाटील आनंदा भटू पाटील याला सहा मे रोजी धुळे येथील प्रतिबंधक विभागाने ताब्यात घेतले.
याबाबत तक्रारदाराने दिलेल्या माहितीनुसार, त्याच्या विरोधात पत्नीने पोलीस ठाण्यात भारतीय दंड विधानाप्रमाणे गुन्हा दाखल केला आहे. या गुन्ह्याचा तपास लवकर करून चार्जशीट कोर्टात दाखल करायचे असेल तर पोलिसांना 10 हजार रुपये द्यावे लागतील असे संशयित आनंदा पाटील याने तक्रारदाराला सांगितले होते.
16 एप्रिल रोजी याबाबतची मागणी करण्यात आली. अखेर 8 हजार रुपयांवर तडजोड झाली. तक्रारदाराला लाच द्यावयाची इच्छा नसल्याने त्याने धुळे येथे एसीबीकडे तक्रार दिली. या तक्रारीची शहानिशा करून ती खरी असल्याचे निष्पन्न झाले.
सहा मे रोजी या रकमेपैकी दोन हजाराचा हप्ता स्वीकारताना संशयिताला अटक करण्यात आली. लाचलुचपत प्रतिबंधक विभागाचे उपअधीक्षक सचिन साळुंखे यांच्या मार्गदर्शनाखाली पोलीस निरीक्षक पंकज शिंदे व सहकाऱ्यानी ही कारवाई केली.
