क्राईम ब्लास्ट ब्यूरो
वृद्ध महिलेकडे घरफोडी करून तांब्यापितळेची भांडी आणि टीव्ही चोरून नेणाऱ्या दोन चोरट्यांना शहर पोलिसांच्या डीबी पथकाने शिताफीने अटक केली.
शहरातील किस्मत नगर येथील मीराबाई दिलीप कोळी यांच्या घराचे कुलूप तोडून तांब्यापितळेची भांडी आणि टीव्ही असा 13 हजार 500 रुपयांचा मुद्देमाल चोरून नेला होता. मीराबाई बाहेरगावी गेल्याची संधी साधून 24 ते 29 ऑक्टोबरदरम्यान ही घरफोडी करण्यात आली होती.
या गुन्ह्याचा तपास करतांना पोलिस निरीक्षक रवींद्र देशमुख व डीबी पथकाला संशयित कमलेश तथा पप्पू शालिक माळी व राहुल रतीलाल सुतार (दोघे रा.किस्मत नगर) यांनी ही चोरी केल्याची माहिती मिळाली. त्यांना ताब्यात घेऊन चौकशी केली असता दोघांनी चोरीची कबुली देऊन चोरलेला मुद्देमाल काढून दिला. पोलिस अधीक्षक संजय बारकुंड, अपर अधीक्षक प्रशांत बच्छाव, डीवायएसपी दिनेश आहेर यांच्या नेतृत्वाखाली पोलिस निरीक्षक रवींद्र देशमुख, सहायक पोलिस निरीक्षक गणेश फड, डीबी पथकाचे हवालदार ललित पाटील, लादूराम चौधरी, गोविंद कोळी, विनोद आखडमल, मनोज दाभाडे, प्रशांत पवार, होमगार्ड मिथून पवार, चेतन भावसार, शरद पारधी व नाना अहिरे यांनी ही कामगिरी बजावली.
