बिजासनी मंदिरासमोर भीषण अपघात, एक ठार
क्राईम ब्लास्ट ब्यूरो
मुंबई आग्रा राष्ट्रीय महामार्गावर बडी बिजासन माता मंदिरासमोर कंटेनर ट्रकच्या मागील बाजूला धडकून झालेल्या अपघातात चालक ठार झाला. हा अपघात इतका भीषण होता की, कंटेनरची केबिन तोडून चालकाला बाहेर काढावे लागले.
29 सप्टेंबरला मध्यरात्री दोन ते तीन वाजेच्या दरम्यान हा अपघात घडला. दोन्ही वाहने सेंधव्याकडून शिरपूरच्या दिशेने येत होती. बिजासन देवी मंदिरासमोर उतारावर कंटेनर (एमपी 09, एचजी 4910) च्या चालकाचे वाहनावरील नियंत्रण सुटले. भरधाव वेगात जाऊन कंटेनर पुढे चालणाऱ्या ट्रक (एमपी 09, एचजे 6660) च्या मागील बाजूस धडकला. ही धडक इतकी जोरदार होती की, कंटेनरची मजबूत केबिन पूर्णतः चेपली गेली. चालक केबिनमध्ये दाबला गेला. बिजासन चौकी पोलिसांनी स्थानिकांच्या मदतीने त्याला बाहेर काढण्याचा प्रयत्न केला. केबिन तोडून त्याला बाहेर काढले. तोपर्यंत त्याचे निधन झाले होते. बिजासन चौकीचे प्रभारी सुरेश पाटीदार यांनी सांगितले की, मृताची ओळख त्याच्या खिशातील आधार कार्डवरून पटली. मृताचे नाव मोहम्मद अश्फाक मन्सूर शाह (वय 62, रा.बदनावर जि.धार, मध्यप्रदेश) आहे. रात्रीच्या सुमारास वाहनांची संख्या कमी असल्यामुळे अपघातात संभाव्य मोठी प्राणहानी टळली असे बघ्यांनी सांगितले.
