क्राईम ब्लास्ट ब्यूरो
सर्व्हेच्या माहितीत दुरुस्ती करण्याच्या नावाखाली आशा वर्करला बोलावून घेत तिचा विनयभंग केल्याच्या संशयावरून आरोग्यसेवकाविरोधात सांगवी पोलीस ठाण्यात गुन्हा दाखल करण्यात आला. ही घटना 14 सप्टेंबरला सकाळी पावणेबाराला वकवाड (ता.शिरपूर) येथील आरोग्य उपकेंद्राच्या क्लिनिक रूममध्ये घडली.
पीडित 30 वर्षीय आशा वर्कर महिलेने दिलेल्या फिर्यादीनुसार, 14 सप्टेंबरला सकाळी नऊला तिने गावात कुष्ठरोग व क्षयरोग विषयक माहिती गोळा केली. संकलित केलेली एकत्रित माहिती तिने आरोग्य सेवक महेश विषयी यांच्या मोबाईलवर व्हाट्सएपने पाठवली. काही वेळाने तिच्यासोबत आरोग्य सेविका म्हणून काम करणाऱ्या महिलेच्या मोबाईलवर संपर्क करून महेश ईशी याने तुमची माहिती चुकली असून आपल्याला पुन्हा गावात सर्व्हे करावा लागेल, तुम्ही उपकेंद्रात या असे सांगितले. त्यामुळे संबंधित महिला पावणेबाराला वकवाड येथील आरोग्य उपकेंद्रात गेली. तेथील क्लिनिक रूममध्ये गेल्यावर महेश ईशी याने जवळ बोलावून घेत तिचा विनयभंग केला. संबंधित महिला रागावून घरी निघून गेली. मैत्रिणीला हा प्रकार सांगत असताना संशयित पुन्हा तिच्या घरी आला. त्याने घडलेल्या प्रकाराबद्दल माफी मागितली. काही वेळाने महिलेचा पती घरी आल्यावर तिने हा प्रकार सांगितला. त्यानंतर पती-पत्नीने सांगवी पोलीस ठाणे गाठून संशयिताविरोधात फिर्याद दिली. त्यावरून सांगवी पोलिस ठाण्यात संशयित महेश देवराम ईशी याच्याविरोधात विनयभंगाचा गुन्हा दाखल करण्यात आला.
