शिसाका भाडेतत्वावर देण्याचा ठराव एकमताने मंजूर
क्राईम ब्लास्ट ब्यूरो
शिरपूर शेतकरी साखर कारखाना भाडेतत्वावर देण्यात यावा अशा मागणीचा ठराव कारखान्याच्या सर्वसाधारण सभेत शनिवारी (दि.10) एकमताने मंजूर करण्यात आला. या ठरावानंतर शिसाका भाडेतत्वावर देऊन सुरु करण्याच्या हालचालींना वेग येईल अशी अपेक्षा शेतकरी, सभासदांनी व्यक्त केली.
शिसाकाचे अध्यक्ष माधवराव पाटील यांच्या अध्यक्षतेखाली सभासदांची सर्वसाधारण सभा बोलावली होती. स्वातंत्र्यसैनिक शंकरनाना लॉन्समध्ये आयोजित सभेत माजी मंत्री आमदार अमरीशभाई पटेल, आमदार काशीराम पावरा, प्रियदर्शनी सूतगिरणीचे अध्यक्ष भूपेशभाई पटेल, जिल्हा परिषदेचे अध्यक्ष डॉ.तुषार रंधे, शिसाकाचे उपाध्यक्ष दिलीपभाई पटेल, के.डी.पाटील, नारायण चौधरी, नरेंद्रसिंह सिसोदिया, संग्रामसिंह राजपूत, जि.प.सदस्य देवेंद्र पाटील, संचालक डिगंबर माळी, राहुल रंधे, भरत पाटील, वासुदेव देवरे, योगेश बोरसे आदिंसह तालुक्यातून शिसाकाचे सभासद उपस्थित होते.
माजी नगराध्यक्ष प्रभाकर चव्हाण यांनी प्रास्तविकात शिसाकाच्या सभेचा उद्देश सांगून अजेंडा सादर केला. त्यांनी शिरपूर साखर कारखाना सुरु करण्यासाठी भाडेतत्वावर देण्यात यावा अशा मागणीचा ठराव सभेसमोर मांडला. शेतकरी विकास फाऊंडेशनचे मोहन साहेबराव पाटील यांनी ठरावाला अनुमोदन देऊन शिसाका तातडीने सुरु करण्याची कार्यवाही करावी अशी अपेक्षा व्यक्त केली. सभासदांमधून आवाजी बहुमताने तो मंजूर करण्यात आला. त्यानंतर मानव एकता पार्टीचे अध्यक्ष सुभाषसिंह जमादार यांनी मनोगत व्यक्त करण्याचा प्रयत्न केला. मात्र सभा संपली असल्याचे कारण देऊन त्यांना थांबवण्यात आले. राष्ट्रगीताने सभेची सांगता झाली. शिरपूर साखर कारखाना 12 वर्षापासून बंद अवस्थेत असून जनरल मिटींगच्या ठरावानंतर तो कधी सुरु होईल याची सभासदांना प्रतिक्षा लागून आहे.
