क्राईम ब्लास्ट ब्यूरो
पाहुणी म्हणून घेऊन गेलेल्या अल्पवयीन मुलीची साडेतीन लाख रुपयांत विक्री झाली. खरेदी करणाऱ्याने तिच्याशी बळजबरीने लग्न लावले. तिला घरात ठेऊन बलात्कार केला. या घटनेमुळे नंदुरबार जिल्ह्यात खळबळ माजली आहे.
धडगाव तालुक्यातील एका गावात ही घटना घडली. मार्च महिन्यात मुलीच्या बापाकडे त्याचे परिचित व राडीकलम ता.धडगाव येथील रहिवासी संदीप सुकलाल पावरा व संगीता संदीप पावरा आले होते. त्यांची नजर घरातील अल्पवयीन मुलीवर पडली. तिला काही दिवसांसाठी पाहुणी म्हणून घरी घेऊन जातो अशी गळ त्यांनी घातली. मुलीच्या बापाने त्यास संमती दिली.
घरी नेल्यावर काही दिवसातच पावरा दाम्पत्याने टेम्भुर्णी ता.माढा जि.सोलापूर येथील सुकऱ्या महाडिक याच्या मध्यस्थीने तीन लाख 60 हजार रुपयात आलेगाव जि. सोलापूर येथील गोविंद याला विक्री केली. गोविंदने तिच्याशी बळजबरीने विवाह केला. तसेच तिच्या इच्छेविरुद्ध वेळोवेळी शारीरिक संबंध ठेवले असे तिच्या वडिलांनी फिर्यादीत म्हटले आहे. संशयित महाडिक, गोविंद, पावरा दाम्पत्य व गोविंदचे आईवडील यांच्याविरोधात धडगाव पोलिस ठाण्यात गुन्हा दाखल करण्यात आला.
