क्राईम ब्लास्ट ब्यूरो
शिकवणीच्या वर्गात धक्का लागल्याच्या कारणावरून विद्यार्थ्यांच्या दोन गटात तुफान हाणामारी झाली. त्यामुळे नागरिक भयभीत झाले. एकाच्या कमरेत चाकू खुपसला तर दुसऱ्याच्या डोक्यात फरशी घालून गंभीर जखमी करण्यात आले. शहराला झालंय तरी काय आणि पोलिस काय करताहेत असा प्रश्न नागरिक विचारत आहेत.
साईम अकिल पिंजारी (१८) व त्याचा भाऊ अर्शद हे पोलिस मुख्यालयासमोर असलेल्या क्लासमध्ये शिकतात. त्यांच्यासोबत शिकणाऱ्या आदित्य खडके याच्याशी धक्का लागल्याच्या कारणावरून पिंजारी बंधूंचा वाद झाला. वाद वाढत जाऊन दोघांनीही आपापल्या मित्रांचे टोळके बोलावून घेतले. क्लास सुटताच दोन्ही गटांत तुंबळ हाणामारी झाली. त्यात खडके गटातील एकाच्या कमरेत चाकू खुपसण्यात आला तर पिंजारी याच्या गटातील एकाच्या डोक्यात फरशी टाकली. या घटनेनंतर जळगाव शहरात खुनाची अफवा पसरली होती. पोलिसांनी तातडीने कार्यवाही सुरू करून काहींना अटक केली आहे.
