शिरपूर : तालुक्यातील शिंगावे येथे किरकोळ वादातून घरात घुसून पती-पत्नीला मारहाण केल्याची घटना घडली असून, याप्रकरणी चौघांविरुद्ध शिरपूर शहर पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, शिंगावे येथील किरण कमलेश पाटील वय 31 यांनी दिलेल्या फिर्यादीनुसार, 9 जून रोजी सकाळी सुमारे 10 वाजेच्या दरम्यान त्यांच्या घराजवळ गोंधळ सुरू असल्याचे लक्षात आल्यानंतर त्या बाहेर आल्या. त्यावेळी काही जण त्यांच्या पती कमलेश पाटील यांना शिवीगाळ करत लाकडी काठ्यांनी मारहाण करत असल्याचे दिसून आले.
फिर्यादीने पतीची सुटका करून त्यांना घरात नेण्याचा प्रयत्न केला असता, संशयितांनी घरात घुसून दोघांनाही मारहाण केल्याचा आरोप करण्यात आला आहे. तसेच फिर्यादीच्या गळ्यातील सोन्याचे मंगळसूत्र व सोन्याची पोत तुटून नुकसान झाल्याचेही तक्रारीत नमूद करण्यात आले आहे. मारहाणीदरम्यान जिवे ठार मारण्याची धमकी दिल्याचाही आरोप करण्यात आला आहे.
या घटनेत कमलेश पाटील जखमी झाल्याने त्यांच्यावर प्रथम शिरपूर येथील रुग्णालयात उपचार करण्यात आले. प्रकृतीनुसार पुढील उपचारासाठी त्यांना धुळे येथील खासगी रुग्णालयात दाखल करण्यात आल्याचे समजते.
याप्रकरणी राजू भिल, भदू भिल, साहेबराव भिल आणि अमोल बडर सर्व रा. शिंगावे, ता. शिरपूर यांच्याविरुद्ध विविध कलमान्वये गुन्हा दाखल करण्यात आला आहे. पुढील तपास शिरपूर शहर पोलीस करीत आहेत.
