शिरपूर : तालुक्यातील आमोदे शिवारात सर्पदंश झालेल्या 30 वर्षीय तरुणाचा उपचारादरम्यान मृत्यू झाल्याची दुर्दैवी घटना घडली आहे. या घटनेमुळे परिसरात शोककळा पसरली असून नातेवाईकांवर दुःखाचा डोंगर कोसळला आहे.
मृत युवकाचे नाव कमल काळू पावरा (वय 30, रा. खंबाळे, ता. शिरपूर) असे आहे. मिळालेल्या माहितीनुसार, सोमवारी दुपारी सुमारे चार वाजेच्या दरम्यान आमोदे शिवारातील महामार्गावरील एस्सार पेट्रोल पंपाजवळ असताना त्यांना सापाने दंश केला. घटनेनंतर त्यांना तातडीने शिरपूर येथील उपजिल्हा रुग्णालयात दाखल करण्यात आले.
रुग्णालयात वैद्यकीय अधिकाऱ्यांनी त्यांच्यावर उपचार सुरू केले होते. मात्र प्रकृती गंभीर होत गेल्याने अखेर मंगळवारी (9 जून) सकाळी सुमारे 11 वाजेच्या सुमारास वैद्यकीय अधिकारी डॉ. रविंद्र पावरा यांनी तपासणी करून त्यांना मृत घोषित केले.
याप्रकरणी उपजिल्हा रुग्णालयातील वॉर्डबॉय लेखन गुशिंगे यांनी शिरपूर शहर पोलीस ठाण्यात माहिती दिली. त्यानुसार पोलिसांनी अकस्मात मृत्यूची नोंद केली असून पुढील तपास पोहेकॉ कुंदन करीत आहेत.
दरम्यान, सर्पदंशामुळे एका तरुणाचा झालेला मृत्यू ही घटना परिसरासाठी हळहळ व्यक्त करणारी ठरली असून नागरिकांनी पावसाळ्याच्या पार्श्वभूमीवर अधिक सतर्क राहण्याचे आवाहन करण्यात येत आहे.
