शिरपूर (प्रतिनिधी) तालुक्यातील हाडाखेड येथील महाराष्ट्र–मध्यप्रदेश सीमा तपासणी नाक्यावर शासकीय कामकाजात अडथळा निर्माण करून गोंधळ घातल्याप्रकरणी एका व्यक्तीविरुद्ध शिरपूर तालुका पोलीस ठाण्यात गुन्हा दाखल करण्यात आला आहे.
मोटार वाहन निरीक्षक किरण विलास लबुडे (वय ३२) यांनी दिलेल्या फिर्यादीनुसार, ८ जून रोजी रात्री साडेनऊच्या सुमारास सीमा तपासणी नाक्यावर नियमित वाहन तपासणी सुरू होती. यावेळी राजस्थानमधील दोन मालवाहू वाहनांची वजन व कागदपत्रांची तपासणी करण्यात येत होती.
दरम्यान, सरोज पाटील हे तपासणी नाक्यावर आले. त्यांनी संबंधित वाहनांच्या तपासणीबाबत आक्षेप घेत कर्मचाऱ्यांशी वाद घातल्याचे फिर्यादीत नमूद करण्यात आले आहे. तसेच शासकीय कामकाजात हस्तक्षेप करून तपासणी प्रक्रियेत अडथळा निर्माण केल्याचा आरोपही करण्यात आला आहे.
याशिवाय तपासणी नाक्यावरील कर्मचाऱ्यांशी गैरवर्तन करत शासकीय मालमत्तेचे नुकसान केल्याचाही आरोप फिर्यादीत करण्यात आला आहे. घटनेनंतर मोटार वाहन निरीक्षक लबुडे यांनी शिरपूर तालुका पोलीस ठाण्यात तक्रार दाखल केली.
तक्रारीच्या आधारे पोलिसांनी संबंधित व्यक्तीविरुद्ध विविध कलमान्वये गुन्हा दाखल केला असून, प्रकरणाचा पुढील तपास पोलीस हेड कॉन्स्टेबल मोहन पाटील करीत आहेत.
