शिरपूर : तालुक्यातील कुवा येथे शेतात काम करत असताना अचानक प्रकृती बिघडल्याने ४७ वर्षीय शेतकऱ्याचा मृत्यू झाल्याची घटना बुधवारी (ता. २८) घडली. सतीष गोकुळ गुजर (वय ४७, रा. कुवा, ता. शिरपूर, जि. धुळे) असे मृत शेतकऱ्याचे नाव आहे.
याबाबत शाम सुरेश गुजर यांनी शिरपूर शहर पोलिस ठाण्यात खबर दिल्यानंतर अकस्मात मृत्यूची नोंद करण्यात आली आहे.
मिळालेल्या माहितीनुसार, सतीष गुजर हे बुधवारी सकाळी शेतात कामासाठी गेले होते. सकाळी साडेदहाच्या सुमारास त्यांना अचानक उलटी होऊन प्रकृती बिघडली. ही माहिती मिळताच नातेवाईकांनी तातडीने तुकाराम महाराज यांच्या शेतातील झोपडीकडे धाव घेतली. तेव्हा सतीष गुजर हे खाटेवर बेशुद्ध अवस्थेत पडलेले आढळून आले.यानंतर नातेवाईकांनी त्यांना तात्काळ खासगी वाहनाने शिरपूर येथील कॉटेज हॉस्पिटलमध्ये दाखल केले.मात्र, वैद्यकीय तपासणीनंतर डॉ. अमोल जैन यांनी सकाळी ११ वाजता त्यांना मृत घोषित केले.
या घटनेमुळे कुवा परिसरात हळहळ व्यक्त होत आहे. दरम्यान, मृत्यूचे नेमके कारण अद्याप स्पष्ट झाले नसून पुढील तपास पोहेकॉ प्रेमसिंग गिरासे करीत आहेत.
