शिरपूर : पुणे जिल्ह्यातील भोर तालुक्यातील नसरापूर येथे चिमुकलीवर झालेल्या पाशवी अत्याचार व खूनप्रकरणी तसेच चाकण येथे साडेतीन वर्षांच्या मुलावर अनैसर्गिक अत्याचार करून त्याचा खून केल्याच्या घटनांमुळे राज्यभर संतापाची लाट उसळली आहे. या पार्श्वभूमीवर शिरपूर येथे सामाजिक संघटनांनी निषेध व्यक्त करत कडक कारवाईची मागणी केली आहे.
दरम्यान, शिरपूर शहरातील एका खासगी दवाखान्यात गर्भपिशवीच्या शस्त्रक्रियेदरम्यान कापडासदृश्य वस्तू रुग्णाच्या पोटात राहिल्याचा धक्कादायक प्रकार समोर आला असून संबंधित डॉक्टरांविरुद्ध गुन्हा दाखल करण्यात आला आहे. मात्र, अद्याप अटक न झाल्याने नागरिकांमध्ये नाराजी व्यक्त होत आहे.
या सर्व घटनांचा निषेध करत संबंधित आरोपींना कठोर शिक्षा देण्यात यावी, तसेच दोषी डॉक्टरांना तात्काळ अटक करून त्यांचा वैद्यकीय परवाना रद्द करावा, अशी मागणी पोलीस निरीक्षक किशोरकुमार परदेसी यांना दिलेल्या निवेदनातून करण्यात आली. हे निवेदन मुख्यमंत्री व गृहमंत्री यांनाही पाठवण्यात आले आहे.
यावेळी मनोज पावरा, कैलास पावरा, शिवाजी पावरा, लकी पावरा, किस्मत पावरा, बजाऱ्या पावरा, मुराज्या पावरा, नरेश पावरा, विजय पावरा, सरलाबाई पावरा, कैलास लकड्या पावरा, जगदीश पावरा, ज्ञानेश्वर मोरे आदी उपस्थित होते. टीम बिरसा आर्मी व इतर सामाजिक संघटनांच्या वतीने ही कारवाई करण्यात आली.
