शिरपूर : तालुक्यातील १६ ग्रामपंचायतींमधील पोटनिवडणुकीचा निकाल मंगळवारी (दि.२९) जाहीर करण्यात आला. चार ग्रामपंचायतींमध्ये थेट सरपंच पदासाठी तर एका ग्रामपंचायतीत सदस्य पदासाठी निवडणूक झाली होती. मतदान सोमवारी (दि.२८) पार पडले होते.
थेट सरपंच पदाच्या निवडणुकीत खर्दे ग्रामपंचायतीत माजी सरपंच भरत लोटन गुजर यांनी १२२४ मते मिळवत विजय मिळविला. चांदसे ग्रामपंचायतीत कलाबाई तात्या पावरा यांनी ६४२ मते मिळवून थेट सरपंचपद पटकावले.
तऱ्हाड कसबे ग्रामपंचायतीत तुकाराम संतोष कोळी यांनी ७०६ मते मिळवत विजय संपादन केला. पनाखेड ग्रामपंचायतीत संगीता नरेश पावरा यांनी ५४९ मते मिळवून सरपंचपदावर निवड झाली.
भोईटी ग्रामपंचायतीतील सदस्य पदाच्या निवडणुकीत सुरेश भोग्या पावरा यांनी १९४ मते मिळवत विजय मिळविला.
दरम्यान, काही ग्रामपंचायतींमध्ये सदस्य पदासाठी बिनविरोध निवडही झाली. अजनाड येथून महेंद्र सीताराम हाके, खर्दे खुर्द येथून भुऱ्या तोताराम भील, टेंभेपाडा येथून गुंजाऱ्या उदया पावरा, तोंदे येथून सरलाबाई धनराज पाटील, मांजरोद येथून मोतीलाल पांडुरंग पाटील, उमर्दा येथून इंद्रसिंग कातिलाल वळवी, लौकी येथून मनोज सुरसिंग भील तसेच बुडकी येथून माया ग्यानसिंग पावरा हे सदस्य बिनविरोध निवडून आले.
निकाल जाहीर होताच विजयी उमेदवारांच्या समर्थकांनी जल्लोष करत आनंद व्यक्त केला.
