खंबाळे येथे ‘रोबोटिक्स व एआय’ समर कॅम्पला उत्स्फूर्त प्रतिसाद

शिरपूर : तालुक्यातील ग्रामीण व आदिवासी भागातील विद्यार्थ्यांमध्ये आधुनिक तंत्रज्ञानाची आवड निर्माण व्हावी आणि स्थानिक समस्या तंत्रज्ञानाच्या मदतीने सोडवण्याचे कौशल्य विकसित व्हावे, या उद्देशाने येथील खंबाळे येथील आर. सी. पटेल माध्यमिक व उच्च माध्यमिक विद्यालयात ‘रोबोटिक्स व कृत्रिम बुद्धिमत्ता (एआय)’ या विषयावरील दहा दिवसीय समर कॅम्प सुरू करण्यात आला आहे. स्टेमसेज प्रायव्हेट लिमिटेड यांच्या सहकार्याने आयोजित या शिबिराचे उद्घाटन २० एप्रिल रोजी मुख्याध्यापक नितीन चौधरी यांच्या हस्ते झाले.
या शिबिरात ६० विद्यार्थ्यांचा सहभाग असून त्यांना बेसिक रोबोटिक्स, इलेक्ट्रॉनिक्स, मशीन लँग्वेज, सेन्सर तंत्रज्ञान तसेच विविध इलेक्ट्रॉनिक उपकरणांची ओळख व वापर यांचे प्रत्यक्ष प्रशिक्षण दिले जात आहे. विद्यार्थ्यांनी स्वतः मॉडेल तयार करण्यावर विशेष भर देण्यात आला असून ‘करून शिकणे’ या पद्धतीचा अवलंब करण्यात येत आहे.
प्रथमेश माळी, मंदार पाटील, संकेत देवरे व अतुल बोरसे हे तज्ज्ञ मार्गदर्शक विद्यार्थ्यांना प्रात्यक्षिकांसह मार्गदर्शन करत आहेत. शिबिराच्या अखेरीस २९ एप्रिल रोजी विद्यार्थ्यांनी तयार केलेल्या रोबोटिक मॉडेल्सचे प्रदर्शन आयोजित करण्यात येणार आहे.
या उपक्रमासाठी शिक्षक जी. डी. शिवदे, दीपक राजपूत व के. बी. शिरसाळे यांनी विशेष परिश्रम घेतले आहेत. या कॅम्पमुळे खंबाळे परिसरातील विद्यार्थ्यांमध्ये विज्ञान व तंत्रज्ञानाबद्दल लक्षणीय उत्सुकता निर्माण झाल्याचे दिसून येत आहे.