फोन न केल्याच्या कारणावरून संताप; पतीकडून पत्नीची दगडाने ठेचून हत्या

शिरपूर (प्रतिनिधी) : अत्यंत किरकोळ कारणावरून घडलेल्या धक्कादायक घटनेत खैरखुटी (ता. शिरपूर) येथे पतीने आपल्या पत्नीची दगडाने ठेचून हत्या केल्याची घटना उघडकीस आली आहे. या प्रकरणी शिरपूर तालुका पोलीस ठाण्यात गुन्हा दाखल करण्यात आला असून आरोपी पतीला पोलिसांनी अटक केली आहे.
मिळालेल्या माहितीनुसार, सुनील सायमल पावरा (वय 30) हा काही दिवसांपासून बाहेरगावी होता. दरम्यान, त्याची पत्नी ललिता सुनील पावरा (वय 25) हिने त्याला फोन का केला नाही, या कारणावरून घरी परतल्यानंतर दोघांमध्ये वाद झाला. हा वाद इतका विकोपाला गेला की, रागाच्या भरात सुनील पावरा याने घराजवळील दगड उचलून पत्नीच्या डोक्यात मारला.
या गंभीर मारहाणीत ललिता पावरा हिचा जागीच मृत्यू झाला. घटनेनंतर परिसरात एकच खळबळ उडाली. माहिती मिळताच शिरपूर तालुका पोलिसांनी घटनास्थळी धाव घेत पंचनामा करून मृतदेह शवविच्छेदनासाठी पाठविला.
या प्रकरणी पोलिसांनी भारतीय न्याय संहिता (BNS) कलम 103 अन्वये खूनाचा गुन्हा दाखल केला आहे. आरोपी सुनील पावरा यास तत्काळ अटक करण्यात आली असून पुढील तपास शिरपूर तालुका पोलीस करीत आहेत.या घटनेमुळे खैरखुटी गावात भीतीचे वातावरण पसरले असून, क्षुल्लक कारणावरून घडलेल्या या प्रकाराने सर्वत्र हळहळ व्यक्त होत आहे.