शिरपूर : तालुक्यातील आरोग्य सुविधांना नवी दिशा देणारा महत्त्वपूर्ण टप्पा २५ एप्रिल २०२६ रोजी गाठला जाणार आहे. एस.व्ही.के.एम. संचलित तपनभाई मुकेशभाई पटेल मेमोरियल हॉस्पिटलचे उद्घाटन मुख्यमंत्री देवेंद्र फडणवीस यांच्या हस्ते होणार असून, या निमित्ताने शिरपूरात विविध विकासकामांचा धडाका पाहायला मिळणार आहे.
श्री विलेपार्ले केळवणी मंडळाचे अध्यक्ष तथा माजी मंत्री आ.अमरीशभाई पटेल आणि सह-अध्यक्ष भूपेशभाई पटेल यांच्या दूरदृष्टीतून हा प्रकल्प साकार झाला आहे. या उद्घाटन सोहळ्यास मंत्री हसन मुश्रीफ, गिरीष महाजन, जयकुमार रावल, संजय सावकारे यांच्यासह धुळे-नंदुरबार जिल्ह्यातील सर्व आमदार उपस्थित राहणार आहेत.
मुख्यमंत्र्यांचा दौरा दुपारी ३ वाजता शिरपूर विमानतळावर आगमनाने सुरू होईल. त्यानंतर एस.व्ही.के.एम. इंजिनिअरिंग कॉलेज, विविध औद्योगिक प्रकल्प, नर्सिंग कॉलेज यांचे उद्घाटन व पाहणी करण्यात येणार आहे. सायंकाळी ५.०८ वाजता हॉस्पिटलचे उद्घाटन झाल्यानंतर, रात्री ७ वाजता आर.सी.पटेल फार्मसी कॉलेज मैदानावर जाहीर सभा होणार आहे. यावेळी स्टेजवरुन वर्च्युअल यंत्रणेद्वारे तरडी येथील ॲग्रीकल्चर कॉलेज व फॉर्मसी कॉलेज,निमझरी नाक्यावरील आर.सी.पटेल इंग्लिश मेडियम स्कूलचे उदघाटन होईल.तसेच नटवाडे येथील देवमोगरा माता मंदिर, दहिवद येथील, इंटरनॅशनल मोटर ड्रायव्हींग स्कूलचे दहिवद येथील भूमिपूजन होणार आहे.
शिरपूर शहरातील अरुणावती नदीकाठावरील या प्रकल्पामुळे परिसरातील नागरिकांना आधुनिक आणि सुलभ आरोग्य सुविधा उपलब्ध होणार असून, हा प्रकल्प आरोग्य क्षेत्रात मोठा बदल घडवेल, अशी अपेक्षा व्यक्त केली जात आहे.
