धुळे एलसीबीची कारवाई; पिस्टल बाळगणारा शिरपूरचा युवक जेरबंद

धुळे : स्थानिक गुन्हे शाखेने (एलसीबी) केलेल्या कारवाईत वरवाडे येथील एका तरुणाला गावठी पिस्टल बाळगल्याप्रकरणी अटक करण्यात आली. त्याच्याकडून पिस्टल, मॅगझीन आणि एक जिवंत काडतूस जप्त करण्यात आले आहे.
शिरपूरहून धुळेच्या दिशेने शस्त्रांची तस्करी होत असल्याची माहिती पोलिसांना मिळाली होती. त्यानुसार एलसीबी पथकाने नगावबारी शिवारात सापळा रचला. हॉटेल साईकिशन परिसरात संशयास्पद हालचाली करताना दिसलेल्या तरुणाला ताब्यात घेऊन झडती घेतली असता त्याच्याकडून सुमारे ४० हजार रुपये किमतीचे गावठी पिस्टल व मॅगझीन जप्त करण्यात आले.
तसेच अंगझडतीदरम्यान त्याच्या खिशातून अंदाजे १ हजार रुपये किमतीचे एक जिवंत काडतूसही आढळले. चौकशीत त्याने आपले नाव राहुल पांडुरंग पाटील रा. वरवाडे, ता. शिरपूर असे सांगितले.
याप्रकरणी पश्चिम देवपूर पोलीस ठाण्यात गुन्हा दाखल करण्यात आला असून पुढील तपास सुरू आहे. ही कारवाई जिल्हा पोलीस अधीक्षक श्रीकांत धिवरे व अपर पोलीस अधीक्षक अजय देवरे यांच्या मार्गदर्शनाखाली एलसीबीचे निरीक्षक श्रीराम पवार पीएसआय चेतन मुंढे,पोहेकॉ पवन गवळी, आरिफ पठाण, राहूल सानप, देवेंद्र ठाकूर व मयूर पाटील यांच्या पथकाने केली.