धुळे – मोहाडी येथील इंडो कंपनी परिसरातील एका विहिरीत सापडलेल्या कुजलेल्या अनोळखी मृतदेहाच्या प्रकरणाचा अखेर उलगडा झाला असून, अनैतिक संबंधाच्या संशयातून पतीने नात्यातील तरुणाची हत्या केल्याची धक्कादायक बाब समोर आली आहे. या प्रकरणी मोहाडी पोलिसांनी मुख्य संशयीतसह त्याच्या पत्नीला अटक केली आहे.
२७ मार्च रोजी संबंधित विहिरीत एका पुरुषाचा कुजलेल्या अवस्थेतील मृतदेह आढळून आला होता. मृतदेहाची अवस्था अत्यंत विद्रूप असल्याने ओळख पटवणे अवघड झाले होते. सुरुवातीला हा आकस्मिक मृत्यू असावा, असा अंदाज व्यक्त करण्यात आला होता. मात्र, शवविच्छेदन अहवालात डोक्याला गंभीर दुखापत झाल्यामुळे मृत्यू झाल्याचे निष्पन्न झाल्यानंतर पोलिसांनी तपासाची दिशा बदलली.दरम्यान, मृताच्या हातावर गोंदलेले नाव (टॅटू) हेच ओळख पटवण्याचे महत्त्वाचे धागेदोरे ठरले. त्यावरून मृताची ओळख रवि मालचे अशी पटली.
तपासादरम्यान समोर आले की, रवि मालचे याचे आरोपी बापू मालचे यांच्या पत्नीशी प्रेमसंबंध होते. या कारणावरून आरोपीच्या मनात संताप साचला होता. अखेर १८ मार्च रोजी आरोपीने रवीवर दगडाने वार करून त्याची हत्या केली. गुन्हा लपवण्यासाठी आरोपीने पत्नीच्या मदतीने मृतदेह जवळील विहिरीत फेकून दिला.दरम्यान, १८ ते २७ मार्च या कालावधीत मृतदेह विहिरीतच पडून होता. पोलिसांनी तांत्रिक तपास व चौकशीच्या आधारे गुन्ह्याचा छडा लावला असून, पुढील तपास सुरू आहे.
