धडगाव : राजबर्डी–धडगाव डांबरी रस्त्यावर रात्रीच्या गस्तीदरम्यान वनविभागाने अवैध सागवान वाहतुकीवर मोठी कारवाई करत वाहनासह २ लाख ८४ हजार ५३६ रुपयांचा मुद्देमाल जप्त करण्यात आला.ही कारवाई दिनांक २४ फेब्रुवारी २०२६ रोजी पहाटे सुमारे ४ वाजता करण्यात आली.
अक्राणी व बिलगाव रेंजच्या वनकर्मचाऱ्यांनी संयुक्तपणे गस्त घालत असताना शेलकुई गावाजवळ महिंद्रा कंपनीची पांढऱ्या रंगाची मॅक्स पिकअप (क्रमांक एम.एच.०४ बी.यू. ४७६५) अडवली. तपासणीदरम्यान वाहनात सागवानाच्या ३० दांड्या आढळून आल्या. या सागवानाची किंमत २४ हजार ५३६ रुपये असून वाहनाची अंदाजे किंमत २ लाख ६० हजार रुपये आहे. एकूण २ लाख ८४ हजार ५३६ रुपयांचा मुद्देमाल जप्त करण्यात आला.
सदर वाहन धडगावकडे अवैधरित्या सागवान वाहतूक करत असताना आढळून आले. मात्र वाहन चालकाने अंधाराचा फायदा घेत वाहन जागेवर सोडून पलायन केले. त्याचा शोध घेण्यात आला, मात्र तो मिळून आला नाही. जप्त वाहन व मुद्देमाल पहाटे धडगाव टिंबर डेपोवर पावतीने जमा करण्यात आला.
या प्रकरणी वनरक्षक रोहिदास पावरा यांनी तक्रार दाखल केल्याने भा.व.अ. १९२७ च्या विविध कलमान्वये गुन्हा नोंदविण्यात आला आहे. पुढील तपास धडगावचे वनपाल दिलीप पाटोळे करीत आहेत.
ही कारवाई धुळे वनविभागच्या वनसंरक्षक श्रीमती निनु सोमराज, नंदुरबार वनविभागचे उपवनसंरक्षक संतोष सस्ते, धुळे विभागीय दक्षता विभागाचे वनाधिकारी राजेंद्र सदगीर व आक्राणीचे सहाय्यक वनसंरक्षक नजय साळुंके यांच्या मार्गदर्शनाखाली करण्यात आली. वनक्षेत्रपाल चारुशीला काटे व बिलगाव वनक्षेत्रपाल यांच्या नेतृत्वाखाली वनपाल दिलीप पाटोळे, भरतसिंग परदेशी, वनरक्षक मंगेश वळवी, अशोक पावरा, पवन पाडवी, रोहिदास पावरा, दिलवरसिंग पावरा, गिरधर पावरा, दिनेश वसावे तसेच वाहनचालक हेमंत पावरा यांनी ही कारवाई यशस्वी केली.
