मांडळ शिवार येथे कनकेश्वर महादेव मंदिराची प्राणप्रतिष्ठा सोहळा उत्साहात संपन्न

शिरपूर (प्रतिनिधी) मांडळ शिवार येथील श्री कनकेश्वर महादेव मंदिरातील प्राणप्रतिष्ठा सोहळा अत्यंत भक्तीमय आणि उत्साहपूर्ण वातावरणात पार पडला. ग्रामस्थांच्या उपस्थितीत वेदघोष, मंत्रोच्चार आणि धार्मिक विधींच्या साक्षीने मंदिरात महादेवाची प्राणप्रतिष्ठा करण्यात आली.
या कार्यक्रमाला प्रमुख पाहुणे म्हणून उद्योगपती जनक भाई पटेल, बोराडीचे उपसरपंच राहुल रंधे, नगरसेवक वासुदेव देवरे, पंचायत समिती सदस्य यतिश सोनवणे, नगरसेवक विनायक कोळी आदी मान्यवर उपस्थित होते. मान्यवरांच्या हस्ते पूजा-अर्चा व विधिवत प्राणप्रतिष्ठा करण्यात आली.
कार्यक्रमाची सुरुवात गणेशपूजनाने झाली. त्यानंतर अभिषेक, हवन, कलशारोहण व महाआरतीचे आयोजन करण्यात आले. संपूर्ण परिसर ‘हर हर महादेव’च्या घोषणांनी दुमदुमून गेला होता. ग्रामस्थांनी मोठ्या संख्येने उपस्थित राहून धार्मिक कार्यक्रमात सहभाग घेतला.
मंदिर उभारणीसाठी विविध दात्यांनी उदारपणे देणगी देत सहकार्य केले. त्यांच्या योगदानामुळे मंदिराचे भव्य व आकर्षक बांधकाम पूर्णत्वास गेले. याबद्दल सर्व दात्यांचे आयोजकांकडून विशेष आभार व्यक्त करण्यात आले.
कार्यक्रमानिमित्त महाप्रसादाचेही आयोजन करण्यात आले होते. हजारो भाविकांनी प्रसादाचा लाभ घेतला. गावातील युवक, महिला मंडळ व ग्रामस्थांनी कार्यक्रमाच्या यशस्वी आयोजनासाठी परिश्रम घेतले.
मांडळ शिवार परिसरात उभारण्यात आलेले हे कनकेश्वर महादेव मंदिर भविष्यात धार्मिक व सामाजिक उपक्रमांचे केंद्र ठरणार असून ग्रामस्थांमध्ये समाधान व आनंदाचे वातावरण निर्माण झाले आहे. कार्यक्रमाचे आयोजन साई प्रसाद कॉलनीतील नागरिक व मित्र मंडळांनी सहकार्य केले.