धुळ्यात एलसीबीकडून २४ तासांत दोन घरफोड्या उघड; दोन सराईत गुन्हेगार मुद्देमालासह जेरबंद

धुळे : शहरातील दोन घरफोडीच्या गुन्ह्यांचा अवघ्या २४ तासांत छडा लावत स्थानिक गुन्हे शाखेने दोन सराईत गुन्हेगारांना अटक केली आहे. संशयियांकडून सुमारे ९० हजार ५०० रुपयांचा मुद्देमाल हस्तगत करण्यात आला आहे.
धुळे शहरातील अभय कॉलेजजवळील रामनगर परिसरातील एका घरातून १४ फेब्रुवारी ते १७ फेब्रुवारीदरम्यान ४५ हजार ९५० रुपयांचे सोन्या-चांदीचे दागिने, इन्व्हर्टर व बॅटरी चोरीस गेल्याची घटना घडली होती.तसेच मनोहर टॉकीज मागील अमरनगर परिसरात १५ ते १७ फेब्रुवारीदरम्यान दुसरी घरफोडी होऊन सुमारे ९६ हजार रुपयांचे दागिने व रोकड लंपास करण्यात आली होती.या दोन्ही घरफोडी प्रकरणी आझादनगर पोलीस ठाण्यात कलमान्वये गुन्हा दाखल करण्यात आला होता.
या दोन्ही गुन्ह्यांची माहिती मिळताच स्थानिक गुन्हे शाखेच्या पथकाने तपास सुरू केला. गोपनीय माहिती व तांत्रिक विश्लेषणाच्या आधारे रहान उर्फ पोपण्या फरीद पठाण वय २० व शाहरुख शेख सलीम वय २०, दोन्ही रा.अंबिकानगर पत्रेवाली मशिद जवळ,धुळे यांना ताब्यात घेण्यात आले.चौकशी दरम्यान दोघांनीही घरफोडीची कबुली दिली.संशयीतांकडून सोन्या-चांदीचे दागिने,इन्व्हर्टर,बॅटरी तसेच मोटारसायकल असा एकूण ९० हजार ५०० रुपयांचा मुद्देमाल जप्त करण्यात आला आहे.पुढील तपास आझादनगर पोलीस करीत आहेत.धुळे एलसीबीने 24 तासाच्या आत गुन्ह्यांचा उलगडा झाल्याने परिसरातील नागरिकांनी समाधान व्यक्त केले आहे.