तालुक्यातील तरडी येथे महिलेचा विनयभंग; संशयितास पोलिसांसमोरच चोप,गुन्हा दाखल

शिरपूर : तालुक्यातील तरडी येथे एका परप्रांतीय तरुणाने स्थानिक ४० वर्षीय महिलेचा विनयभंग केल्याची घटना शनिवारी रात्री घडली. या घटनेनंतर गावात संतप्त पडसाद उमटले असून संशयिताला पोलिसांसमोरच जमावाने मारहाण केल्याचा प्रकारही घडला. परिस्थितीचे गांभीर्य लक्षात घेऊन पोलिसांनी तत्काळ हस्तक्षेप करत संशयीताला ताब्यात घेतले.
याप्रकरणी संबंधित महिलेने थाळनेर पोलीस ठाण्यात येथे तक्रार दाखल केली आहे. तक्रारीनुसार, शनिवारी रात्री ती आपल्या राहत्या घरी असताना बिरेंद्रकुमार रामधीन यादव (वय २७, रा. रूपपीखर, बिहार) हा जबरदस्तीने घरात घुसला.विनयभंग करण्याच्या उद्देशाने त्याने महिलेबरोबर जवळीक साधण्याचा प्रयत्न केला.महिलेने आरडाओरड केल्याने संशयिताने तेथून पळ काढला.
या प्रकरणी पोलिसांनी संशयिताविरुद्ध विनयभंग तसेच अत्याचार प्रतिबंधक कायद्यान्वये गुन्हा दाखल केला आहे. तपासाची सूत्रे हातात घेत पोलिसांनी तरडी गावातून संशयिताला ताब्यात घेतले.
दरम्यान,गावात पुन्हा अशी घटना घडू नये, या मागणीसाठी महिलांनी एकत्र येत संशयिताला आमच्या ताब्यात द्या, अशी मागणी केली. पोलिसांच्या वाहनात बसविण्यात आलेल्या संशयितास काहींनी मारहाण करण्याचाही प्रयत्न केला. पोलिसांनी प्रसंगावधान राखत परिस्थिती नियंत्रणात आणली. कायद्याने कठोर कारवाई केली जाईल, असे आश्वासन दिल्यानंतर ग्रामस्थ माघारी फिरले.
संशयित हा बिहार राज्यातील असून थाळनेर परिसरात मजुरीच्या कामासाठी आल्याची माहिती पोलिसांनी दिली.पुढील तपास थाळनेर पोलिसांकडून सुरू आहे.