वाघाडी टी-पॉईंटवर भीषण अपघात; ट्रॅक्टरने दिली अपेरिक्षाला धडक,4 जण जखमी

शिरपूर : शहरातील शिरपूर-शहादा मार्गावरील वाघाडी टी-पॉईंट येथे गुरुवारी सकाळी साडेअकराच्या सुमारास झालेल्या भीषण अपघातात महाविद्यालयीन विद्यार्थिनीसह चार जण गंभीर जखमी झाले. भरधाव वेगाने येणाऱ्या बोरवेल ट्रॅक्टरने अपेरिक्षाला जोरदार धडक दिल्याने अपेरिक्षाचे मोठे नुकसान झाले.
मिळालेल्या माहितीनुसार, वाघाडीहून शिरपूरकडे येणाऱ्या बोरवेल ट्रॅक्टरने टी-पॉईंटवरून जात असलेल्या अपेरिक्षाला समोरून जोरदार धडक दिली. धडक इतकी भीषण होती की ट्रॅक्टरचा पुढील भाग अपेरिक्षाच्या पुढील फ्रेममधून आत घुसत मागील बाजूपर्यंत गेला. अपघातानंतर परिसरात एकच गोंधळ उडाला.
या अपघातात वाघाडी येथील महाविद्यालयीन विद्यार्थिनी नेहा संतोष ठाकूर (वय १८), अपेरिक्षा चालक आशिफ युनूस मण्यार, कमलबाई सेना पवार (वय ६६) व शांताबाई सुदाम निकम (वय ६५) हे गंभीर जखमी झाले. जखमींना तातडीने उपचारासाठी रुग्णालयात दाखल करण्यात आले आहे.
दरम्यान, वाघाडी टी-पॉईंटवर वारंवार अपघात होत असल्याने स्थानिक नागरिकांनी संताप व्यक्त केला असून, येथे वेगमर्यादा फलक, स्पीड ब्रेकर, सिग्नल किंवा इशारा चिन्हे बसवून प्रतिबंधात्मक उपाययोजना करण्याची मागणी प्रशासनाकडे केली आहे. पोलिसांकडून पुढील तपास सुरू आहे.