आढे येथील आयुर्वेदिक दवाखान्यास तातडीने वैद्यकीय अधिकारी नियुक्त करा-क्षत्रिय शिवराणा संस्थेची मागणी

शिरपूर : तालुक्यातील आढे येथील शासकीय आयुर्वेदिक दवाखान्यात तातडीने वैद्यकीय अधिकाऱ्याची नियुक्ती करावी, अशी ठाम मागणी क्षत्रिय शिवराणा संस्थेच्या वतीने करण्यात आली आहे. यासंदर्भात संस्थेच्या पदाधिकाऱ्यांनी शिरपूर पंचायत समितीचे आरोग्य विस्ताराधिकारी प्रकाश वाघ यांना निवेदन सादर केले.
आढे येथील आयुर्वेदिक दवाखान्यात यापूर्वी कार्यरत असलेल्या वैद्यकीय अधिकाऱ्यांची पदोन्नती झाल्याने मागील दीड महिन्यांपासून हे पद रिक्त आहे. परिणामी, दवाखान्याचे काम सध्या केवळ परिचरांच्या सहकार्याने सुरू असून रुग्णांना अपेक्षित वैद्यकीय सेवा मिळण्यात अडचणी येत आहेत.
आढे गावासह परिसरातील अनेक गावांसाठी हा आयुर्वेदिक दवाखाना अत्यंत महत्त्वाचा असून दररोज मोठ्या प्रमाणावर रुग्ण येथे उपचारासाठी येतात. मात्र, गावात एकही खासगी डॉक्टर उपलब्ध नसल्याने नागरिकांना किरकोळ आजारांसाठीही शिरपूर शहरात जावे लागते. यामुळे वेळ, पैसा व त्रास सहन करावा लागत असल्याचे निवेदनात नमूद करण्यात आले आहे.
ग्रामीण भागातील नागरिकांच्या आरोग्याचा विचार करता, आढे येथील आयुर्वेदिक दवाखान्यात किमान आठवड्यातून तीन दिवस तरी वैद्यकीय अधिकाऱ्यांची नियुक्ती करावी, अशी मागणी संस्थेच्या वतीने करण्यात आली आहे. याबाबत तातडीने सकारात्मक निर्णय घेण्यात यावा, अन्यथा पुढील आंदोलनाचा इशाराही देण्यात आला आहे.
निवेदन सादर करताना क्षत्रिय शिवराणा संस्थेचे पदाधिकारी व ग्रामस्थ उपस्थित होते. आरोग्य विस्ताराधिकारी प्रकाश वाघ यांनी याबाबत वरिष्ठ स्तरावर प्रस्ताव पाठविण्याचे आश्वासन दिले आहे.