अवैध गौण खनिज वाहतुक कारवाईदरम्यान महसूल पथकावर हल्ला; चौघांविरुद्ध गुन्हा दाखल

शिरपूर तहसील कार्यालयाच्या अवैध गौण खनिज उत्खनन व वाहतूक प्रतिबंधक पथकावर जिवघेणा हल्ला केल्याची गंभीर घटना शनीवारी (दि ३१) सकाळी ११ वाजेच्या सुमारास मुंबई–आग्रा राष्ट्रीय महामार्ग क्रमांक ३ वरील शहादा फाटा परिसरात घडली. या प्रकरणी हायवा वाहन चालकासह चौघांविरुद्ध शहर पोलीस ठाण्यात गुन्हा दाखल करण्यात आला आहे.
या घटनेप्रकरणी मंडळ अधिकारी महेंद्र पाटील यांनी शहर पोलीस ठाण्यात फिर्याद दाखल केली आहे.सदर तक्रारीनुसार महसूल मंडळ अधिकारी महेंद्र पाटील यांच्या नेतृत्वाखाली महसूल अधिकारी रणजित जोगदंड, राहुल गुणवंते,एस.पी. महाजन,एन.एस.पटेल, जयेश राजपूत, महेश सावळे, गणेश बागुल, योगेश पाटील, रविकिरण माळी, विजय पवार तसेच महसूल सेवक विशाल कोळी हे पथक अवैध गौण खनिज वाहतुकीवर कारवाईसाठी मुंबई आग्रा राष्ट्रीय महामार्गवर 31 जानेवारी रोजी सकाळी गस्तीवर असतांना चोपडा फाट्याकडून कळमसरे (ता. शिरपूर) दिशेने अवैध गौण खनिजाची वाहतूक करणारे पांढऱ्या व निळ्या रंगाचे हायवा वाहन (क्रमांक एम. एच. १८ / सी. डी. २७७७) थांबविण्याचा प्रयत्न केला असता, संबंधित चालकाने पथकाच्या सदस्यांच्या अंगावर वाहन घालून जिवे ठार मारण्याचा प्रयत्न केला व वाहन चोपडा फाट्याच्या दिशेने पळवून नेले. पुढे चोपडा फाटा येथील भारत पेट्रोलियम पंपाजवळ हे वाहन थांबविण्यात आले.तेथे वाहनावरील अनोळखी चालकासह रोहित त्र्यंबक शेटे,विक्की चौधरी व अमोल शेटे यांनी महसूल पथकाशी हुज्जत घालून शिवीगाळ केली तसेच महसूल कर्मचारी महेश सावळे यांच्या अंगावर धावून जाऊन धक्काबुक्की करत गळा दाबून जिवे ठार मारण्याचा प्रयत्न केला. या झटापटीत सावळे यांचा शर्ट फाटला.तसेच संशयितांनी अरेरावीची भाषा वापरत शासकीय कामात अडथळा निर्माण करीत वाहन चालकास वाहनापुढे कोणी आल्यास त्यांच्या अंगावर वाहन घालण्यास चिथावणी देत जिवे ठार मारण्याचा प्रयत्न करून वाळूसह वाहन पळवून नेल्याचे फिर्यादीत नमूद केले आहे.
दाखल फिर्यादीवरून चालकासह चौघांविरुद्ध विविध कलमान्वये गुन्हा दाखल करण्यात आला असून पुढील तपास शहर पोलीस करीत आहे.