गर्दीचा फायदा घेत शिरपूर बसस्थानकात प्रवाशाचे ५० हजार लंपास

शिरपूर शहरात प्रवाशांच्या सुरक्षेचा बोजवारा उडाल्याचे पुन्हा एकदा स्पष्ट झाले असून, शिरपूर बसस्थानकात दिवसाढवळ्या खिसेकापूने ५० हजार रुपयांची रोकड पळविल्याची धक्कादायक घटना मंगळवार (दि. २८) रोजी सकाळी साडेआठच्या सुमारास घडली.
किशोर फकीरा मोरे (वय ५१, व्यवसाय शेती, रा. कुरखनी, ता. शिरपूर) हे आपल्या मुलाच्या शाळेची फी भरण्यासाठी घेतलेले पैसे परत करण्यासाठी धुळ्याकडे जाण्यास निघाले होते. शिरपूर ते छत्रपती संभाजीनगर जाणारी बस लागल्यानंतर बसमध्ये चढताना प्रवाशांची प्रचंड गर्दी झाली. याच गोंधळाचा गैरफायदा घेत अज्ञात खिसेकापूने मोरे यांच्या पँटच्या उजव्या खिशातून तब्बल ५० हजार रुपयांची रोकड हातोहात लंपास केली.खिशाजवळ स्पर्श जाणवताच मोरे यांनी आरडाओरड करत बसमधून खाली उतरताच चोरटा गर्दीत मिसळून पसार झाला.बसस्थानकात सीसीटीव्ही व पोलीस बंदोबस्त असूनही अशी घटना घडल्याने नागरिकांमध्ये संताप व्यक्त होत आहे.खिसेकापूंचे टोळके सक्रिय झाले असून सामान्य प्रवाशांच्या पैशांवर डल्ला मारला जात असल्याचे चित्र आहे.
या प्रकरणी शिरपूर पोलीस ठाण्यात अज्ञात चोरट्याविरुद्ध गुन्हा दाखल करण्यात आला असून पुढील तपास पोलीस हेडकॉन्स्टेबल चेतन सोनवणे करीत आहेत.