शिरपूर फाट्यावरून ‘हायवा'(टिपर) चोरीला;एकच खळबळ

शिरपूर तालुक्यातील आमोदा येथील रहिवासी कुलदीप गजेंद्रसिंग राजपूत यांच्या मालकीचा सुमारे लाखो रुपये किमतीचा हायवा (टिपर) अज्ञात चोरट्यांनी पळवून नेल्याची घटना १८ जानेवारी रोजी सकाळी उघडकीस आली असून,एकच खळबळ उडाली आहे.            मिळालेल्या माहितीनुसार, कुलदीप राजपूत यांच्या मालकीचा ‘टाटा’ कंपनीचा हायवा (टिपर)(क्र. MH-18 BZ-2706) नेहमीप्रमाणे शिरपूर फाटा येथील ‘भारत सर्व्हिस सेंटर’च्या परिसरात सुरक्षिततेच्या कारणास्तव उभा करण्यात आला होता. मात्र, १७ जानेवारीच्या रात्री ते १८ जानेवारीच्या पहाटेदरम्यान अज्ञात चोरट्यांनी संधी साधून हे अवजड वाहन लंपास केले.१८ जानेवारी रोजी सकाळी वाहन चालक आणि संबंधित कर्मचारी सर्व्हिस सेंटरवर पोहोचले असता, ठरलेल्या ठिकाणी हायवा दिसून आला नाही. आजूबाजूला शोध घेऊनही वाहन मिळून न आल्याने अखेर चोरी झाल्याचे स्पष्ट झाले. या घटनेची माहिती तत्काळ शिरपूर शहर पोलिसांना देण्यात आली.महामार्गालगत असलेल्या परिसरातून एवढे मोठे वाहन चोरीला गेल्याने खळबळ माजली आहे. पोलिसांनी या घटनेची गांभीर्याने दखल घेतली असून, चोरट्यांचा माग काढण्यासाठी परिसरातील आणि हायवेवरील विविध टोलनाक्यांवरील सीसीटीव्ही (CCTV) फुटेजची तपासणी सुरू केली आहे. तसेच महामार्गावरील वाहनांच्या येण्या-जाण्याच्या नोंदीही तपासल्या जात आहेत. या प्रकरणी अज्ञात चोरट्यांविरुद्ध गुन्हा दाखल करण्याची प्रक्रिया सुरू असून अधिक तपास शिरपूर पोलीस करत आहेत.