दहिवद येथे युवकाचा संशयास्पद मृत्यू 

शिरपूर  तालुक्यातील दहिवद गावाजवळ विनायक काशिनाथ पाटील या 35 वर्षीय युवकाचा संशयास्पद मृत्यू झाला. त्याच्या नातेवाईकांनी विनायकचा मृत्यू घातपाती असल्याचा संशय व्यक्त केला आहे. दरम्यान पोलिसांनी एका संशयिताला ताब्यात घेतले.

 विनायक दहिवद येथील रहिवासी होता. तो शिरपूरजवळ टेक्स्टाईल कंपनीत कामाला होता. 19 ऑगस्टला दुपारी तो गावाजवळच्या शेतात गेला होता. तेथून बराच वेळ न परतल्याने त्याचा शोध सुरू झाला. दैवत गावाजवळ असलेल्या मानव केंद्रासमोर मोकळ्या जागेतील चारीत  तो मरून पडलेला आढळला. त्याच्या डोक्यावर गंभीर स्वरूपाची जखम दिसून आली. मृतदेह शिरपूर उपजिल्हा रुग्णालयात दाखल करण्यात आला. तेथे नातलगांनी गर्दी केली होती. त्याचा मृत्यू संशयास्पद असून संशयिताला तातडीने अटक करावी अशी मागणी त्यांनी केली. दोन दिवसापूर्वी त्याच्याशी गावात एकाने भांडण उतरून काढले होते अशीही माहिती त्यांनी दिली. दरम्यान पोलिसांनी एकाला ताब्यात घेतले आहे. मृत विनायक पाटील यांच्या पश्चात आई-वडील, दोन भाऊ असा परिवार आहे. माजी सरपंच तथा शिरपूर साखर कारखान्याच्या कामगार युनियनचे नेते कै.जगन भिला पाटील यांचा तो पुतण्या होय.