क्राइम ब्लास्ट ब्यूरो
वडिलांनी घरातून निघून जावे अशा कारणावरुन त्यांच्याशी भांडण करुन बेदम मारहाण करुन खून केल्याच्या गुन्ह्यात सांगवी पोलिसांनी संशयित मुलास अटक केली. खुनाची घटना एक जूनला रात्री साडेअकराला तालुक्यातील बोराडी गावात घडली.
सिंगा तुमडू पावरा (वय 70) असे मृताचे नाव असून त्यांचा मुलगा सुनिल पावरा (वय 30) याने त्यांचा खून केल्याचा संशय आहे. पोलिसांनी दिलेल्या माहितीनुसार, बापलेकांनी एकत्र घर बांधले होते. परंतु दोन दिवसांपासून वडिलांनी घर सोडून जावे अशी मागणी करुन सुनिल त्यांच्याशी भांडत होता. त्यात एक जूनला रात्री तो घरात आल्यावर वडील झोपल्याचे पाहून त्याचा संताप अनावर झाला. त्याने सिंगा पावरा यांना शिवीगाळ केली आणि लाकडी दांड्याने त्यांच्या डोक्यात मारले. त्यात गंभीर जखमी झालेल्या सिंगा पावरा यांना शिरपूर उपजिल्हा रुग्णालय व तेथून धुळे येथे हिरे वैद्यकीय महाविद्यालयात करण्यात आले. तेथे त्यांचे निधन झाले.
सिंगा पावरा यांचा मोठा मुलगा अमावश्या पावरा याने दिलेल्या फिर्यादीवरुन संशयित सुनिल पावरा याच्याविरोधात सांगवी पोलिस ठाण्यात खुनाचा गुन्हा दाखल करण्यात आला. पोलिसांनी संशयित सुनिल पावरा याला शिताफीने अटक केली. पोलिस अधीक्षक श्रीकांत धिवरे, अपर अधीक्षक किशोर काळे, डीवायएसपी सुनिल गोसावी यांनी पोलिस निरीक्षक जयपाल हिरे, उपनिरीक्षक मिलिंद पवार, हवालदार संदीप ठाकरे, रमेश माळी, भूषण चौधरी, संजय चव्हाण, मोहन पाटील, रणजीत वळवी, अलताफ मिर्झा यांचे कौतुक केले.
