पहा व्हिडीओ
क्राईम ब्लास्ट ब्यूरो
शिरपूर तालुक्यातील हाडाखेड येथील आरटीओ चेक पोस्टवर गुटख्याने भरलेला कंटेनर सांगवी पोलिसांनी दोन ऑक्टोबरच्या मध्यरात्री जप्त केला. या कारवाईत दीडशे पोत्यात भरलेला फाइव्ह एचके ब्रँडचा गुटखा व कंटेनर मिळून एकूण 89 लाख 35 हजार रुपये किंमतीचा मुद्देमाल पोलिसांनी ताब्यात घेतला असून चालकाला अटक करण्यात आली.
जिल्हा पोलिस अधीक्षक संजय बारकुंड यांनी सांगवी पोलिस ठाण्यात या कारवाईची माहिती दिली. सांगवीचे एपीआय जयेश खलाणे यांना गुट महामार्गावर कंटेनरमधून सुगंधित पानमसाल्याची तस्करी सुरु असल्याची माहिती मिळाली होती. त्यांनी सहकार्यांसोबत हाडाखेड येथील आरटीओ चेक पोस्टवर सापळा रचला. संशयित कंटेनर (आरजे 11, जीसी 2809) चेक पोस्टवर आल्यानंतर पोलिसांनी तो थांबवला. त्याच्यामधील मालाबाबत चौकशी केली असता चालकाने उडवाउडवीची उत्तरे दिली. त्यामुळे पोलिसांनी संशयावरुन कंटेनरची झडती घेतली. त्यात गुटख्याचा साठा असल्याचे निष्पन्न झाले. त्यामुळे कंटेनर पोलिस ठाण्यात नेऊन तेथे तपासणी करण्यात आली. त्यात एकूण दीडशे पोती गुटख्याने भरल्याचे आढळले.
गुटख्याची एकूण किंमत 64 लाख 35 हजार रुपये आहे. कंटेनरसह एकूण 89 लाख 35 हजार रुपये किंमतीचा मुद्देमाल पोलिसांनी जप्त केला असून चालक अजितसिंह अमरसिंह (वय 35, रा.नागलादाली ता.सदाबाद जि.महामायानगर, उत्तर प्रदेश) याच्या विरोधात अन्न व औषध निरीक्षक किशोर बाविस्कर यांनी दिलेल्या फिर्यादीवरुन गुन्हा दाखल करण्यात आला.
सांगवी पोलिस ठाण्यात जिल्हा पोलिस अधीक्षक संजय बारकुंड यांनी गुटख्याच्या साठ्याची पाहणी केली. या कारवाईत सहभागी पोलिस पथकाला दहा हजार रुपयांचे विशेष पारितोषिक देण्याचे त्यांनी जाहीर केले. पोलिस अधीक्षक संजय बारकुंड, अपर अधीक्षक किशोर काळे, डीवायएसपी सचिन हिरे यांच्या मार्गदर्शनाखाली एपीआय संदीप पाटील, हवालदार संजय माळी, पोलिस नाईक संदीप ठाकरे, हवालदार अलताफ मिर्झा यांनी ही कारवाई केली.
