क्राइम ब्लास्ट ब्यूरो
मुंबई-आग्रा राष्ट्रीय महामार्गावर भरधाव वेगातील ट्रकने बसला धडक देऊन झालेल्या अपघातात शिरपूरच्या रहिवासी तरूणीचा हात कापला गेला. तिला उपचारासाठी इंदोर येथे रवाना करण्यात आले. या अपघातात एक प्रवासी ठार झाला असून 15 जण गंभीर जखमी आहेत.
मध्यप्रदेशातील इंदोरहून नाशिक येथे जाण्यासाठी निघालेल्या प्रवासी बसला एक सप्टेंबरला बिजासन घाटात मागाहून येणार्या ट्रकने जोराची धडक दिली. त्यामुळे नियंत्रण सुटून बस रस्त्यावर उलटली. या अपघातात शिरपूरच्या मानसी अभय (वय 19) या तरूणीचा हात कापला गेला असून तिला इंदोर येथे रवाना करण्यात आले. अपघातात वाहक वास्कले जागीच ठार झाले.
अपघातानंतर ट्रक डिव्हायडरला धडकला. त्यामुळे ट्रकची केबिन चेपली जाऊन चालक अडकला. बराच वेळ प्रयत्न करुन त्याला बाहेर काढण्यात आले. रुग्णवाहिका, पोलिसांची वाहने व खाजगी वाहनांचा वापर करुन जखमींना रुग्णालयात दाखल करण्यात आले. अपघातानंतर बराच वेळ वाहतूक विस्कळीत झाली होती. क्रेनच्या साह्याने अपघातग्रस्त वाहने दूर करुन वाहतूक सुरळीत करण्यात आली.
